«Alatau Aqparat» mediaholdinginde zamanaýi podkast stýdiiasynyń ashylý saltanaty ótti. Is-sharaǵa belgili mediamenedjerler, telearnalar men BAQ basshylary, blogerler, iýtiýberler men kásipkerler, seriktes ujym ókilderi qatysty, – dep habarlaidy Dalanews.kz.
Jobanyń basty maqsaty – dástúrli jáne jańa mediany ushtastyra otyryp, keń aýditoriiaǵa ártúrli formatta sapaly kontent usynyp, otandyq media salany damytýǵa úles qosý. Zamanaýi tehnikalarmen jabdyqtalǵan bul alań – shyǵarmashylyq jobalarǵa serpin berip, jas mamandardy daiarlaýǵa, aqparat keńistiginde jańa ideialardy júzege asyrýǵa múmkindik beredi.
Ashylý saltanatynda «Alatau Aqparat» mediaholdinginiń Bas direktory Erjan Qalymbaiuly «Stýdiiany qoǵamdaǵy ózekti máselelerdi talqylaityn, saraptamalyq pikirler men ekskliýzivti suhbattar usynatyn mazmundy alańǵa ainaldyrýdy maqsat etip otyrmyz. Podkasttar aýditoriianyń aqparat tutyný daǵdysyna sai ázirlenip, ashyq, erkin ári tartymdy formatta usynylady. Basty maqsat – aqparatty sapaly, senimdi, naqty ári qyzyqty etý», – dedi.
Onyń sózinshe, atalǵan stýdiiany «Adyrna» aqparattyq agenttigi bastaǵan birineshe seriktestermen birlese jasaqtaǵan.
Óz keziginde belgili media-menedjer, Qazaqstannyń eńbek sińirgen qairatkeri Nurjan Jalaýqyzy eldegi mediaholdingter arasynda alǵashqylardyń biri bolyp podkast-stýdiia ashyp jatqan áriptesterine sáttilik tiledi.
«Eldi eleń etkizer, kóptiń kóńilinen shyǵatyn, tushymdy oilar aitatyn, kórermeni kóp, taralymy keń joba bolsyn», – dedi ol.
«Habar» agenttigi» AQ Almaty filialynyń direktory Serik Ábikenuly baspasózdiń taǵdyry kúrdelileý bolyp turǵan osynaý shaqta podkast-stýdiia ashý – óte qoldaityn dúnie ekendigin tilge tiek etti.
«Buqaralyq aqparat quraly zamannyń úrdisinen qalmaýy kerek. Sol zamanmen birge qatar qadam basamyz dep táýekel etip bir is bastaǵan ekensizder, sáttilik tileimiz. Osy shaǵyn stýdiiada ulttyń sózin aitatyn, memlekettiń joǵyn joqtaityn úlken oilar aitylsyn», – dedi.
Tanymal jýrnalist-pedagog, ál-Farabi atyndaǵy Qazaq Ulttyq ýniversiteti jýrnalistika fakýltetiniń dekany Qanat Áýesbai: «Qazir elimizde osy mediaholdingter institýty qarqyndy damyp keledi. Sol kóshtiń aldyńǵy qatarynda júrgen «Alatau Aqparat»-ty keiingi bir-eki jyldyń kóleminde jaqsy jaǵynan estip, kórip júrmiz. Gazet endi tek oqytyp qana qoimai, osy podkast-stýdiia arqyly kórsetedi, ári tyńdatady. Iaǵni búginde kóp aitylyp júrgen kross-mediaǵa «Alatau Aqparat» ta ilesti. Demek, tyńdai almaityndar oqidy, oqi almaityndar kóredi. Ozyq ta zamanaýi trendterdiń bárin osy media-stýdiiadan kóreiik!», – dedi.
Sonymen qatar, Arman Áýbákir, Aidos Juqanuly, Baýyrjan Káripov, Erbol Azanbek, Erbol Seiilhan, Meiirjan Áýelhanuly, Aibar Oljaev pen Nurlan Jumahan syndy BAQ salasynyń maitalmandary óz oilaryn ortaǵa saldy.
Stýdiianyń ashylý rásiminen keiin qonaqtar mediaholding mýzeiin aralap, Qazaqstan jýrnalistikasy tarihynan syr shertetin jádigerlermen tanysty.
Podkast stýdiiada túsiriletin saraptamalyq pikirler men ekskliýzivti suhbattar mediaholding quramyna kiretin aqshamnews.kz, vecher.kz jáne alnews.kz aqparatyq resýrstarynda, sonymen qatar, áleýmettik jelilerinde de jariialanyp otyrady.
