Ákim bergen tapsyrmasynyń oryndalý barysyn qadaǵalady
«Yntymaq-3» turǵyn aýdanyna atbasyn burǵan oblys ákimi turǵyndarmen kezdesip, turǵyn aýdannyń máselelerin talqylady, olarmen birge problemalyq jerlerdi aralap, olardyń sheshimi týraly turǵyndarǵa baiandap berdi.
Buǵan deiin aqpan aiynda osy turǵyn aýdandy aralaǵanynda oblys ákimine turǵyndar jol jóndelse, sý jáne elektrmen qamtý máseleleri sheshilse degen ótinishterin aitqan bolatyn. Sol kezde Amandyq Batalov aitylǵan máseleler boiynsha tiisti tapsyrmalar bergen.
Búgingi kúni sol jumystar qarqyndy atqarylyp jatyr. Jeltoqsan kóshesinde ortasha jóndeý jumystary bastalǵan, oǵan 161 mln teńge bólingen, jolǵa asfalt tóseledi. Aýdannyń uzyndyǵy 30 shaqyrym bolatyn 31 kóshesine biylǵy jyly jergilikti biýdjetten 655 mln teńge qarastyrylyp otyr.
Jýyq arada sýmen qamtý máselesi de sheshiledi. Eki aptadan soń barlyq qajetti tekserý jumystarynan soń «Yntymaqqa» sý qosylady. Jobanyń jalpy quny – 203,4 mln teńge, júieniń uzyndyǵy – 16,1 km.
Ótken joly turǵyndar elektr jaryǵynyń jii óshetinin aityp shaǵym bildirgen. Bul máseleniń de túiini tarqamaq. Elektrmen qamtý júiesiniń jalpy uzyndyǵy 20 km, jobanyń quny – 289,5 mln teńge. Qazirgi kezde jumystardyń 84 % aiaqtaldy, shildeniń sońyna qarai jańa transformator qoiylady.
Yntymaqtyqtar osy joly oblys ákiminen úige sý kirgizý máselesin sheshýdi surady. Olar árbir úige sý kirgizý aqysyn úi iesi ózi tóleitinin biletindikterin, turǵyn aýdanda tek bir ǵana traktor bolǵandyqtan, kezekti uzaq kútýge týra keletinin jáne jalǵyz traktor jumys aqysynyń qunyn tym sharyqtatyp jibergenin aitty. Amandyq Batalov qala ákimi Ǵalymjan Ábdiraiymovqa jumysty qoljetimdi baǵada jyldam ári sapaly atqaratyn merdiger kompaniia tabýdy tapsyrdy. Bul jerde avtobýs qatynasy jaǵynan da problemalar týyndap jatady. Bul máseleni baqylaýǵa alý men qysqa merzimde sheshý qala ákimine júkteldi. Sol siiaqty damý josparyna sáikes munda aldaǵy ýaqytta balabaqsha, mektep, aýyldyq dárigerlik ambýlatoriia salynady.
Munan soń oblys ákimi «Jastar - 2» turǵyn aýdanyna bardy. Munda da sýmen, elektrmen qamtý, káriz júiesin tóseý jumystary jalǵasyp jatyr.
Jol jóndeý máselesi de sheshimin tapty. Turǵyn aýdanda qazir 13 kóshe bar. onyń ekeýi – Nurly jol men Qonaev kósheleri asfalttalady, oǵan 82 mln teńge bólindi. Qalǵan 11 kóshege qiyrshyq tas tóseldi, oǵan 150 mln. teńge qarastyryldy.
Qarasha aiyna qarai sýmen qamtý jolǵa qoilady. Qazirgi kezde 20,8 shaqyrymnyń 15,3 shaqyrymy tartylǵan. Jumystar 73,5 % atqaryldy.
Syrtqy elektrmen qamtý júiesi de jasalýda, qyrkúiek aiynda jumystar aiaqtalýy tiis. Tartylýy tiis 52,3 shaqyrymnyń 30,5 shaqyrymy tartyldy. Jobanyń jalpy quny – 364,1 mln teńge.
Káriz júielerin tóseý jalǵasyp jatyr. Onyń jalpy uzyndyǵy 9,2 km.
Turǵyn aýdanda 900 oryndyq mektep salynady, ony jobalaýǵa konkýrs jariialandy.
Al «Shaiqorǵanǵa» gaz ákelindi, jaqyn kúnderi saiajailyqtar óz úilerin kógildir otynmen jylytatyn bolady. Elektrmen qamtý jumystary aiaqtalyp qaldy. Qazir úilerge eseptegish quraldar ornatylyp jatyr. Gazǵa qosylǵan abonentter sany – 622. Transformator men Naberejnaia kóshelerine asfalt tóseýge 81 mln teńge bólindi. Sý qubyry júieleri de tóselýde. Jalpy uzyndyǵy – 13,1 km.
Aqpan aiynda oblys ákimi turǵyndardyń ótinishi boiynsha «Qyzyl tas» saiajaiyn qalamen jalǵastyryp turatyn jańa kópir salýdy tapsyrǵan. Sol siiaqty № 14 avtobýstyń sońǵy aialdamasy mańyna ekinshi kópir salý da júktelgen bolatyn. Osy eki nysannyń qurylysyna tender jariialanyp, jobalyq-zertteý jumystaryna qarjy bólindi. Sonymen birge turǵyndardyń ótinishimen sońǵy aialdama ornatyldy.
Saiajailardy aralap, birqatar tapsyrmalar bergen oblys ákimi Amandyq Batalov:
– Búgin qala shetindegi aýdandar men saiajailardy taǵy bir aralap shyǵyp, buǵan deiin bergen tapsyrmalarymnyń oryndalý barysymen tanystym. Injenerlik jeliler der kezinde tartylmaǵandyqtan, turǵyndar sý men elektr jelilerine qol jetkize almai otyrdy. Barlyq talaptar men normalar eskerile otyryp, meniń tapsyrmalarym boiynsha jumys jasalyp jatyr. «Yntymaq-3» turǵyn aýdanynyń problemalyq máselelerin sheshýdiń ózine ǵana jergilikti biýdjetten 1 mlrd teńgeden astam qarjy bólindi. «Shaiqorǵanǵa» gaz keldi. Áleýmettik nysandar salýdyń qajet ekenin de esten shyǵarmaimyz. Biz barlyq qajetti infraqurylymdy damytýdy jalǵastyra beremiz, – dedi A.Batalov.
