Aqmola oblysynda halyqaralyq áskeri-patriottyq "Aibyn-2026" jastar jiynyna daiyndyq aiasynda jol jóndeý jumystaryna shamamen 2 milliard teńge bólingen. Alaida bul qarajattyń edáýir bóligi jastardy áskeri-patriottyq tárbieleýge emes, jol infraqurylymyn jańartýǵa baǵyttalǵan, dep habarlaidy dalanews.kz.
Goszakupturaly telegram paraqshasynyń málimetinshe, memlekettik satyp alý portalynda 29 mamyr kúni jalpy quny 1,6 milliard teńgeden asatyn eki kelisimshart jariialanǵan. Eki jobanyń tapsyrys berýshileri ártúrli bolǵanymen, merdiger kompaniia birdei.
Alǵashqy kelisimshart boiynsha oblystyq mańyzy bar joldardyń 56 shaqyrymy jóndelmek. Bul maqsatqa 719 million teńge qarastyrylǵan. Joba aiasynda joldyń jekelegen ýchaskelerin qalpyna keltirý, jol belgilerin ornatý jáne jol tańbalaryn syzý jumystary júrgiziledi.
Ekinshi kelisimshart Shoqan Ýálihanov atyndaǵy áskeri kolledjdiń "Amandyq" oqý-jattyǵý ortalyǵyna aparatyn jolǵa qatysty. Uzyndyǵy 6 shaqyrym jol men 1,3 shaqyrym ishki joldardy aǵymdaǵy jóndeýge 893,5 million teńgeden astam qarjy bólingen.
Qosa berilgen qujattarda "Aibyn-2026" halyqaralyq áskeri-patriottyq jastar jiynyn ótkizýge bailanysty Aqmola oblysyna respýblikalyq biýdjetten 1 mlrd 999 mln 906 myń teńge kóleminde nysanaly transfert bólingeni kórsetilgen.
Sonymen qatar atalǵan jol jóndeý jumystary konkýrs ótkizilmei, tikelei kelisimshart jasaý arqyly rásimdelgen. Qujattarda mundai tásildiń naqty sebebi de, merdiger kompaniianyń qandai negizde tańdalǵany da túsindirilmegen.
Sondai-aq jariialanǵan materialdarda "Aibyn-2026" jiynyn ótkizý qajettiligi saiasi, ekonomikalyq nemese áleýmettik turaqtylyqqa qaýip tóndiretin jaǵdailarmen qalai bailanysty ekeni jóninde de naqty túsinikteme berilmegen.
Osylaisha, jol jóndeýge qatysty bul satyp alýlar biylǵy jyly memlekettik satyp alýlarda jii baiqalyp otyrǵan úrdisti — jol qurylysy men jóndeý jobalarynyń básekeli tenderlerden tys, tikelei kelisimsharttar arqyly júzege asýyn taǵy bir márte kórsetti.
