Insaiderler Bergei Rysqaliev pen Asqar Mýsin Londonda ne istep júrgenin aitty, - dep habarlaidy Dalanews.kz "Respýblikaǵa" siltep.
Qazir Atyraý oblysyn uzaq jyldar boiy basqarǵan Bergei Rysqaliev Londonda turyp jatyr. Onyń aǵasy Amanjol Rysqaliev te sonda bolýy múmkin.
Insaiderlerdiń dereginshe, Bergei Rysqaliev pen onyń sybailastarynyń elden qashyp, bosqyn bolýyna Aslan Mýsin kómektesken.
2013 jyly Rysqalievter biýdjet qarajatyn jymqyryp, qylmystyq top qurdy degen kúdikke ilindi.
2019 jyly Rysqaliev syrttai 17 jylǵa sottalyp, aǵasy Amanjol 16 jylǵa sottaldy. Odan bólek, múlikteri tárkilendi.
Rysqalievter eks prezidentke qoqan-loqy kórsetip júrgeni týraly áńgimeler 2019 jyly shyǵa bastaǵan bolatyn. Sol kezde pablikterde Nazarbaev Londondaǵy Gaid-parkte milliarder Vladimir Kim men Qazaqstannyń Ulybritaniiadaǵy elshisi Erlan Ydyrysovpen ketip bara jatqan videosyn taratqan bolatyn.
Keiinnen Rysqalievterdiń adamdary Vladimir Kimniń apartamentin qorshap alǵan kadrlar Rysqalievterdiń qolynda bolǵan kórinedi.
Bul jaǵdaidy zerttep júrgen insaiderlerdiń sózinshe, Rysqalievterdiń qolynda Nazarbaevtyń úshinshi áieli Ásel Isabaevaǵa qatysty kompromat bar. Bul týraly qazirgi májilis depýtaty Ermurat Bapi de aitqan bolatyn.
Aita keteiik,Nazarbaev óz ómiri jaily baiandaǵan kitabynda saiasi aitys-tartystan bólek, jeke ómirine qatysty qym-qýyt oqiǵalardy jipke tizip bergen bolatyn. Ol toqaly bar (ekinshi otbasy) ekenin tuńǵysh ret moiyndaidy. Ásel Isabaevaǵa es-tússiz ǵashyq bolǵanyn aita kele, ekeýiniń arasyndaǵy mahabbat hikaiasyn maiyn tamyzyp baiandaidy.
Odan týǵan eki ul - Taýman men Báikenniń urpaq sabastyǵyn jalǵap, áýlettiń úzilgeli turǵan úmitin qaita tiriltkenin áńgimeleidi. Nazarbaevtyń qos murageri - at jalyn tartyp miner jasqa jetti. Taýman 2005 jyly ómirge kelse, Báiken 2008 jyly dúnie esigin ashqan.
Al Aslan Mýsin 2017 jyly qańtarda zeinetke shyqqan kezden beri Eýropada turyp jatyr.
"Respýblika" insaiderleriniń sózinshe, Ol Latviiada turady. Onyń bul elde turýy da beker emes kórinedi - prezident ákimshiligin basqarǵan Mýsinder áýletiniń birshama aktivi bar.
Kúni keshe Bas prokýratýra Rysqalievke bailanysty jańa derekti bólisti. Bas prokýrordyń orynbasary Áset Shyndaliev “Qazaqstanda sottalǵan Bergei Rysqaliev qalaisha Londonda emin-erkin júr?” dep suraǵan BAQ ókilderine Shyndaliev máseleniń bulyńǵyr ekenin aityp, eks-sheneýnikti elge jetkizý ázirge múmkin emes ekenin atap ótti.
Buǵan deiin Dalanews.kz-ke pikir bildirgen ekonomist Aidar Álibaev Bergei Rysqalievtiń mal-múlkin mańdai terimen tapqanyna kúmán keltirgen.
"Memleketten jyrǵan 72 mlrd óz aldyna, Qazaqstanda turyp 185 obektige ielik etý, munyń bárine adal eńbekpen qol jetkizý múmkin be?
Álbette eger Rysqaliev munyń bárin óz eńbegimen tapsa talasym joq, biraq buǵan dálel retinde onyń resmi tabysyn da jariialaý kerek edi.
Al Bas prokýrorǵa aitarym, bulai únsiz ketýge bolmaidy. Is-áreketińizdi el-jurtqa túsindirýge tiissiz. Halyq kútip otyr. Tipti ne bolǵanyn da túsinbei qaldy. Táýelsiz Qazaqstannyń tarihynda dál mundai soraqy sheshim shyǵarylmaǵan!
Aǵaiyndylardyń dúnie-múlkin qaitarý týraly sheshim onsyz da kóptiń kóńili qalǵan sot júiesi men qylmystyq atqarý júiesiniń bedelin quldyrata túspese, kótermeidi" degen edi sarapshy.
