Almaty qalasynyń Almaly aýdandyq soty zańger ári bloger Ádilethan Moldahanǵa qatysty úkim shyǵaryp, ony QR Qylmystyq kodeksiniń 274-baby 3-bóliginiń 2-tarmaǵy boiynsha kináli dep tanydy, dep habarlaidy dalanews.kz.
Sot úkimimen Ádilethan Moldahan 2 jyl 6 aiǵa bas bostandyǵynan aiyryldy.
Eske salaiyq, Moldahanǵa áleýmettik jelilerde kórineý jalǵan aqparat taratty degen aiyp taǵylǵan. Is boiynsha jábirlenýshiler retinde Almaty qalasy politsiia departamenti bastyǵynyń burynǵy orynbasary Erjan Uzabaev pen Almaty qalasy ákimshilik politsiia basqarmasynyń burynǵy basshysy Serik Shýmaev tanyldy.
Sot protsesi barysynda memlekettik aiyptaýshy Ádilethan Moldahandy úsh jylǵa bas bostandyǵynan aiyrýdy suraǵan. Buǵan deiin prokýror aiypty qaita saralaǵandyqtan, sot otyrysy keiinge shegerilgen bolatyn.
Buǵan deiin jýrnalist Rýslan Ótepbai jábirlenýshi taraptyń qorǵaýshysyna silteme jasap, Uzabaev pen Shýmaevtyń Ádilethan Moldahandy keshirmegenin habarlaǵan edi.
