«Ádil sóz» halyqaralyq sóz bostandyǵyn qorǵaý qory Qazaqstandaǵy táýelsiz BAQ pen jýrnalisterge qarsy kibershabýyldar men áleýmettik jelilerdegi akkaýnttardy buǵattaý oqiǵalaryna bailanysty málimdeme jasady, dep habarlaidy dalanews.kz.
Qordyń málimetinshe, sońǵy ailarda birqatar táýelsiz buqaralyq aqparat quraldary men jýrnalisterdiń saittary kibershabýyldarǵa ushyrap, áleýmettik jelilerdegi akkaýnttary buǵattalǵan nemese olardyń jumysyna jappai shaǵymdar arqyly kedergi keltirilgen.
Atap aitqanda, «Quqyqtyq media-ortalyq» qoǵamdyq uiymynyń saityna kibershabýyl jasalyp, áleýmettik jelidegi paraqshalary buǵattalǵan. Al 2026 jyldyń aqpanynda qordyń YouTube arnasy joiylǵan.
19-21 shilde aralyǵynda QazTAG aqparat agenttiginiń saity da kibershabýyldarǵa ushyrady.
23 shildede YouTube platformasynda jýrnalist Dinara Egeýbaevanyń atynan jalǵan DINARION arnasy ashylyp, onda jasandy intellekt kómegimen daiyndalǵan beinerolikter jariialanǵan. 26 shilde kúni tańerteń jýrnalistiń Instagram jáne Facebook akkaýnttaryna qoljetimdilik ýaqytsha shektelip, keiin qaita qalpyna keltirildi.
Sondai-aq Telegram messendjerinde jýrnalist Vadim Boreikonyń atynan jalǵan habarlamalar tarap, onda qarjylai kómek suraý jáne ýran kenishterine jumysqa shaqyrý týraly aqparat jariialanǵan.
«Respýblika» basylymynyń málimetinshe, 10 shildeden beri olardyń YouTube arnasyna jappai shaǵym túsip, sonyń saldarynan toǵyz beinerolik óshirilgen. Basylymnyń áleýmettik jelidegi paraqshalary men bas redaktor Irina Petrýshovanyń jariialanymdary da birneshe ret buǵattalǵan. Sonymen qatar onyń WhatsApp akkaýntyna da shekteý qoiylǵan.
Jýrnalist Luqpan Ahmediarov óziniń «Prosto jýrnalistika» jobasy avtorlyq quqyqty buzdy degen shaǵymdardan keiin únemi buǵattalatynyn, al resmi paraqshalarynyń kóshirmeleri paida bolatynyn málimdegen. Onyń birneshe WhatsApp nómiri de buǵattalǵan.
Kievte turatyn jýrnalist Natalia Sadykova da jeke paraqshalary men «BASE» jobasynyń akkaýnttary sońǵy eki jyl boiy túrli shabýyldarǵa ushyrap kele jatqanyn habarlaǵan.
Áleýmettik jelilerdegi akkaýnttarynyń buǵattalǵany týraly «Ýralskaia nedelia» bas redaktory Tamara Esliamova, jýrnalister Ásem Japisheva, Murat Daniiar, sondai-aq Elmedia redaktsiiasy da málimdegen.
«Ádil sóz» qorynyń habarlaýynsha, «Shekarasyz tilshiler» (RSF) halyqaralyq uiymy bul jaǵdaidy «Ortalyq Aziiadaǵy táýelsiz jýrnalister men medianyń qorqynyshty ahýaly» dep baǵalap, áleýmettik jelilerdegi júieli máseleler tsenzýranyń kúsheiýine jol ashyp otyrǵanyn atap ótken.
