Qazaqstandyq boksshy Angelina Lýkas memleket basshysy Qasym-Jomart Toqaevqa batyl da ashyq úndeý joldady, dep habarlaidy Dalanews.kz.
Videoda Angelina prezidentten óziniń jetistikterine nazar aýdaryp, absoliýtti álem chempiony ataný jolyndaǵy maqsatyna qoldaý kórsetýin surady.
“Qurmetti Qasym-Jomart Kemeluly! Keiingi birneshe jylda bir qiyn jaǵdaiǵa tap boldym. Elimizdegi keibir aqparat quraldary tarapynan maǵan qarsy maqsatty túrde aqparattyq shabýyldar jasaldy. Jeńisterimdi elemei, jetistikterimdi joqqa shyǵarýǵa tyrysty. Munyń bári siz, qurmetti el Prezidenti meniń jeńisterimnen habarsyz qalýyńyz úshin ádeii uiymdastyrylǵanyna senimdimin. Basqa jol qalmaǵandyqtan, sizge tikelei júginýge májbúrmin. Bul – meniń janaiqaiym”, – dedi sportshy.
Angelina armanyna jetý úshin uzaq jol júrgenin jetkizdi.
“Kásibi mansabymda talai myqty qarsylasty jeńip, birden eki álemdik reitingke endim. Al biyl 7 tamyzda WBC uiymy meni resmi túrde álemdik reitingte №1 dep tanydy. Bul – qazaqstandyq áielder boksy úshin úlken serpilis”, – dep atap ótti Lýkas.
Onyń qarsylastary arasynda aty ańyzǵa ainalǵan esimder bar. 22 márte jeńiske jetken argentinalyq Debora Lopes, 48 jekpe-jek ótkizgen meksikalyq chempion Anna Arassola, sondai-aq ataqty Daniela Asenho. Olardyń barlyǵy da tanymal ári titýldy sportshylar.
Angelinanyń aitýynsha, bul jeńister – tek jeke jetistik emes, búkil Qazaqstannyń halyqaralyq arenadaǵy abyroiyn arttyrý.
Alaida ókinishke qarai, sportshy osy kúnge deiin memleket tarapynan birde-bir resmi marapat ta, tipti quttyqtaý da almaǵanyn aitty.
“Eldiń týyn álemdik arenada kóterip, shyńǵa umtylǵanda, Otanyńnyń qoldaýyn seziný – óte mańyzdy”, – deidi ol.
Sportshy memleket basshysynyń áleýmettik jelidegi belsendiligin biletinin jáne dál osy qoldaýy jańa jeńisterge jol ashatyn qýatty demeý bolaryna senedi.
Video sońynda Angelina ózine sengen jankúierlerine, jazylýshylaryna jáne demeýshilerine shynaiy alǵysyn bildirdi.
“Rahmet sizderge!” – dedi ol.
Aita keteiik, sportshynyń bul úndeýi áleýmettik jelilerde myńdaǵan qoldaýǵa ie bolyp, jurtshylyq onyń tabandylyǵy men batyldyǵyna tánti boldy. Endi búkil el Angelina Lýkas álem chempiony ataǵyn ielenip, qazaqstandyq áielder boksyn jańa beleske kóteretin sátti taǵatsyzdana kútýde.
Buǵan deiin WBC nusqasy boiynsha álem chempiony atanǵan Angelina Lýkas osy bedeldi uiymnyń álemdik reitinginde kósh bastaǵan tuńǵysh qazaqstandyq sportshy bolǵany habarlanǵan edi.
