Eks-ministr Qýandyq Bishimbaevqa qatysty sot otyrysynda Bishimbaevtyń týysy ári ekinshi aiyptalýshy Baqytjan Baijanov oqiǵa bolǵan tún týraly taǵy bir derekti aitty, - dep habarlaidy Dalanews.kz.
"Men jedel járdemniń janynda boldym. Jedel járdemge kelip, "Bishimbaev ózin óltirmekshi" dep kómek suradym. "Olar "bizge kedergi keltirmeńiz, shyǵyńyz" dedi. Sonymen barmen Abylaiǵa habarlastym. Abylai ekeýmiz Bishimbaevty ustap turdyq.
Qýandyqpen sóilesken joqpyz. Qýandyq eseńgirep júrdi. "Baqytjan, men ne istep qoidym?! Qolymmen istegendi moinymmen kóteremin. Adam óltirdim, bala-shaǵamnyń betine qalai qaraimyn? Endi ómir súre almaimyn" degen sózder boldy", - dedi ol.
Buǵan deiin ol Bishimbaev qarashaǵa deiin de úiindegi videony óshirýdi suraǵanyn málimdedi.
"Qarashaǵa deiin 2-3 ai buryn Bishimbaev Turan dańǵylyndaǵy turǵyn úi keshenindegi beinebaqylaý kameralarynan videony óshirýdi surady.
Bul úide ol Saltanatpen birge turdy. Olardyń arasynda urys-keris bolǵan. Ol kezde de muny kórshileri kórmeýin, sondai-aq, áleýmettik jelige taramaýyn qalady dep oiladym. Ol kezde basqarýshy kompaniianyń ofisine bardym, páter ieleri kooperativiniń tóraǵasy Gúlnurǵa meniń kózimshe videony óshirip tastady", - dedi ol sot otyrysynda.
Baijanov qazir PIK ókili videony óshirgenin moiyndamai otyrǵanyn jetkizdi. Aiyptalýshynyń aitýynsha, bul onyń qyzmetine kedergi keltirýi múmkin eken. Alaida Baijanov bul videony qalpyna keltirýge bolatynyn nemese video óshirilgenin kórýge bolatynyn málimdedi.
Sonymen qatar, Baqytjan Baijanov sot otyrysynda qaiǵyly oqiǵa bolǵan kúni Saltanat Núkenovany birneshe ret kórgenin aitty.
"Saltanattyń bir kózi isip turǵanyn kórdim. Vip-bólmeniń ishiniń astań-kesteńi shyǵyp jatty. Dárethananyń esigi qiraǵanyn kórdim. Tańerteń gastroortalyqqa kelgen kezde Bishimbaev túni boiy shý shyǵaryp, ishimdik iship, Saltanatty uryp tastaǵanyn bilip keldim. Bul týraly gastroortalyqqa keler aldynda habardar boldym. Biraq ol kezde eshteńe túsinbedim. Saltanatqa qaýip tónip turǵanyn, ólim men ómirdiń ortasynda turǵanyn bilmedim. Bul aqtalý emes. Men tek shyn máninde ne bolyp jatqanyn kóre almadym.
Bul meniń kinám jáne men oǵan qatty ókinemin. Eger nazar aýdaryp qarasam múlde basqa jaǵdai bolar edi. Endi amal ne? Men ýaqytynda kómektese almasam da Saltanattyń jaqyndary meni keshire alady dep senemin", - deidi Baijanov.
Aita keteiik, Baijanov gastroortalyqta 2022 jyldan beri direktor qyzmetin atqarǵan.
