Búgin Ǵylym ordasynda joǵary bilim jáne ǵylym salasyndaǵy syilyqtar men memlekettik ǵylymi stipendiia laýreattaryn saltanatty marapattaý rásimi ótti, dep habarlaidy Dalanews.kz.
Munda otandyq ǵylymnyń damýyna úles qosyp júrgen birqatar ǵalymdardyń eńbegi joǵary baǵalandy.Bul joǵary bilim salasyndaǵy oqytýshylar men zertteýshilerdiń áleýetin arttyrýǵa, bilim men ǵylymnyń qoǵamdaǵy rólin kúsheitýge baǵyttalyp otyr. Respýblikalyq deńgeidegi marapat ieleriniń qatarynda Abai ýniversitetiniń ǵalymdary da bar.
Saltanatty basqosýǵa QR Ǵylym jáne joǵary bilim ministri Saiasat Nurbek, QR Prezidentiniń janyndaǵy QR Ulttyq ǵylym akademiiasynyń prezidenti Aqylbek Kúrishbaev, JOO men ǵylymi-zertteý institýttarynyń basshylary, ziialy qaýym ókilderi jáne jetekshi ǵalymdar men oqytýshy-professorlar qatysty.
Jiyndy ashqan Saiasat Nurbek memleket damýyndaǵy joǵary bilim men ǵylymnyń róline toqtalyp, aldaǵy júktelgen mindetterdi saralady. Sonymen qatar, «myńnan tulpar, júzden júirik» shyqqan úzdik ǵalymdardy quttyqtap, zor tabys tiledi.
Sahna tórine shyǵyp marapat alǵan úzdikterdiń qatarynda Abai ýniversitetiniń bir top ǵalymy bolǵanyn aita ketýimiz kerek. Atap aitsaq, p.ǵ.d., professor-zertteýshi Uljarqyn Abdigapbarova «Memlekettik ǵylymi stipendiia iegeri» atansa, PhD, Óner fakýltetiniń dekany Kárim Baiǵutov «Daryndy jas ǵalymdarǵa arnalǵan ǵylymi stipendiia iegerleri» respýblikalyq baiqaýynyń jeńimpazy jáne «Memlekettik ǵylymi stipendiia iegeri» atandy.
– Bul – tek jeke jetistik emes, bul – otandyq ǵylymǵa kórsetilgen qoldaýdyń naqty nátijesi. Osyndai múmkindik jasap, ǵylym men joǵary bilim salasyna airyqsha kóńil bólip otyrǵan Memleket basshysyna, Qazaqstan Respýblikasy Ǵylym jáne joǵary bilim ministrligine, sondai-aq bizge árdaiym qoldaý kórsetip kele jatqan ýniversitet basshylyǵyna rizashylyǵymdy bildiremin. Bul senim bizge jańa ǵylymi izdenisterge jol ashyp, el damýyna qyzmet etýge úlken jaýapkershilik júkteidi, – dedi Kárim Baiǵutov kórsetilgen joǵary senim men qoldaý úshin alǵysyn bildirip.
Sonymen qatar, joǵary bilim berýdegi pedagogikalyq sheberligin nyqtaǵan 7 oqytýshy-professor «JOO-nyń úzdik oqytýshysy – 2025» ataǵyn ielendi. Olardyń qataryda geogr.ǵ.d., professor Bahadýrhan Abdimanapov, h.ǵ.k., qaýymdastyrylǵan professor Jazira Mýkataeva, PhD, Biologiia kafedrasynyń meńgerýshisi Asiia Maimataeva, PhD, aǵa oqytýshy Erlan Isakov, PhD, Ǵylymimetriia jáne ǵylymi basylymdar ortalyǵynyń jetekshisi Sanat Qumarbekuly, ped.ǵ.k., postdoktorant Adlet Kariev, PhD, aǵa oqytýshy Nýrjanat Shakirova bar.
Bul marapattar – Abai ýniversiteti ǵalymdarynyń júieli eńbegin, ǵylymi áleýetin jáne bilim men ǵylymdy ushtastyrý jolyndaǵy tabandy izdenisterin kórseteri anyq.
