Semei qalasynyń qylmystyq ister jónindegi aýdanaralyq soty elektrondyq tutyný júielerin (veipterdi) zańsyz ótkizgen jergilikti turǵynǵa qatysty qylmystyq isti qarady, dep habarlaidy Dalanews.kz.
Eske sala keteiik, 2024 jyldyń 20 maýsymynan bastap Qazaqstanda veipterdi jáne olarǵa arnalǵan suiyqtyqtardy satýǵa, taratýǵa, ákelýge jáne óndirýge zańmen tyiym salynǵan.
Soǵan qaramastan sottalǵan azamat «Telegram» messendjerindegi 3700-den astam jazylýshysy bar arna arqyly nikotin quramdy ónimderdi satýdy uiymdastyrǵan. Zańsyz iske taǵy eki adam tartylǵan.
Jedel-izdestirý sharalary barysynda zańsyz ainalymnan 784 elektrondyq qurylǵy men olarǵa arnalǵan suiyqtyqtar tárkilendi.
Sot úkimimen uiymdastyrýshy Qylmystyq kodekstiń 301-1-baby boiynsha kináli dep tanylyp, 2 jylǵa bas bostandyǵyn shekteý jazasyna kesildi. Onyń eki sybailasynyń árqaisysy 1 jyl 6 aiǵa bas bostandyǵyn shekteýge sottaldy.
Sonymen qatar qylmys barysynda paidalanylǵan avtokólikter men uialy telefondar tárkilendi, al tárkilengen ónimder joiylady.
Aita keteiik, sot úkimi ázirge zańdy kúshine engen joq.
Semei qalasynyń prokýratýrasy azamattardy zań talaptaryn saqtaýǵa jáne tyiym salynǵan nikotin ónimderiniń zańsyz ainalymyna qatyspaýǵa shaqyrdy.
