Mańǵystaý oblysy Jetibai aýylynyń mańynda jatqan myńdaǵan tonna munai qaldyǵynyń iesi anyqtalmady. "Oralenergostroi" JShS-ǵa tiesili bolǵan aýmaqtaǵy qaldyqtar sot sheshimimen iesiz múlik dep tanylyp, endi olardy joiý jergilikti atqarýshy organǵa júktelmek, dep habarlaidy dalanews.kz ulysmedia-ǵa siltep.
"Oralenergostroi" Jetibai aýylynyń mańyndaǵy 6 gektardan asa jerdi 49 jylǵa jalǵa alǵan. Kompaniianyń mindeti munai qaldyqtaryn qaita óńdep, jol qurylysyna qajet materialdar óndirý bolǵan. Kásiporyn 8 myń tonna munai qaldyǵyn qaita óńdegenin málimdegen.
Alaida kompaniia mindetterin tolyq oryndamai, aýmaqty qaraýsyz qaldyrǵan. Sonyń saldarynan jer ýchaskesinde munai qaldyǵy jinalyp, ekologiiaǵa ziian kelgen.
2014 jyly sot jaldaý shartyn buzý týraly talapty qanaǵattandyrǵan. Al 2017 jyly "Oralenergostroi" JShS-dan qorshaǵan ortaǵa kelgen 651,7 million teńge kólemindegi zalaldy óndirý týraly sheshim shyǵarylǵan.
Sondai-aq, sot kompaniiaǵa zańsyz paidalanǵan jerdegi qurylystardy buzyp, aýmaqty munai qaldyqtarynan tazartýdy mindettegen. Alaida 2018 jyly sot oryndaýshysy bul sheshimdi oryndaý múmkin bolmaǵandyqtan atqarý qujatyn qaitarǵan.
Ekologiialyq kodekske sáikes iesi anyqtalmaǵan qaldyqtar sot sheshimimen iesiz dep tanylady. Osy tártippen Jetibaida qalǵan munai qaldyqtary da iesiz "múlik" retinde tanylǵan.
Qazir Qaraqiia aýdanynyń ákimdigi qaldyqtardy turǵyn úi-kommýnaldyq sharýashylyq bóliminiń balansyna bergen. Olardy joiý jumystaryn jergilikti atqarýshy organ qoldanystaǵy zańnamaǵa sáikes uiymdastyrýǵa tiis.
