Májilis depýtaty Murat Ábenov Qyzylorda oblysyndaǵy mektep máselesine naqty mysal keltirdi, dep habarlaidy Dalanews.kz.
Onyń aitýynsha, óńirde eki «Keleshek mektebi» men memlekettik mektepterdiń qasynda jeke menshik mektep ashylyp, balalardy 80-100 shaqyrym jerden avtobýspen tasýǵa májbúr etken jaǵdai bar.
«Eki keleshek mektebin ashty. Basqa da memlekettik mektep bar. Biraq sol pysyqtar keledi de Astanaǵa, qarjy ortalyǵyna kelip «men mektep ashaiyn dep edim» dep ruqsat alady, aqsha alady. Memleket te aqshasyn salady oǵan. Sóitip, erteń ol mektep jekeniń menshigine ainalady», – dedi depýtat.
Onyń aitýynsha, memleket jańa mektepterdi ózi salyp jatqanda, dál sol mańnan jeke mektep ashýdyń ekonomikalyq ta, áleýmettik te negizi joq. Nátijesinde oqýshy jetispeidi, al jeke mektepter bala jinaý úshin shalǵai aýyldardan balalardy tasymaldaidy.
«Sonda 80 shaqyrym jerden balalardy avtobýsqa salyp alyp keledi. Kúnde jol júredi. Bul – qaýipsizdik máselesi. Joldan sharshaidy, apat qaýpi bar. Bul balalardyń densaýlyǵyna da, qaýipsizdigine de ziian», – dedi Murat Ábenov.
Depýtattyń pikirinshe, mundai tájiribeni toqtatý qajet.
«Memleket ózi salý kerek mektepti. Prezidenttiń talabymen keleshek mektebi salynady, al qasynan memlekettik aqshaǵa jeke mektep ashylady. Bul durys emes. Baqylaýdyń álsizdigin paidalanyp, zańsyz tirlik jasalǵan», – dedi ol.
Onyń aitýynsha, jeke mektepterdiń bári birdei problema kózi emes. Alaida memlekettik infraqurylym bar jerde jeke jobalardy dál sol núktege ornalastyrý – júiesizdikke ákeledi.
Murat Ábenov bul máselelerdi sheshý úshin zańnamalyq jáne ákimshilik tetikterdi qaita qaraý qajettigin atap ótti. Negizgi maqsat – balalardyń qaýipsizdigi men memlekettik qarjynyń ádil jumsalýy.
