23 qyrkúiekte 45 ret imperator kýbogyn jeńgen sýmo ańyzy Hakýho Sio Qazaqstanǵa keldi, dep habarlaidy Dalanews.kz.
Hakýho Sionyń sapary Astanadan bastalǵan. Ol tanymal kásipker Jumabek Janyqulovtyń shaqyrýymen Qazaqstanǵa kelgen. Hakýho Sio Astana ákimimen, týrizm jáne sport vitse-ministrimen kezdesip, shendiler sýmo sportyna qoldaý bildiretinin aitqan.
Sapar barysynda ol Qazaqstan sýmo komandasyna sheberlik sabaǵyn ótkizip, Qazaqstan Respýblikasy sýmo kúresi qaýymdastyǵynyń ókilderimen kezdesken.
Sonymen qatar, Qazaqstan Respýblikasynyń Ulttyq Olimpiadalyq komitetinde áigili sýmo balýany Hakýho Siomen kezdesý ótken.
Taraptar dástúrli sport túrlerimen qosa, sýmonyń elder arasyndaǵy qarym-qatynasty nyǵaityp, halyqaralyq yntymaqtastyqty ártúrli deńgeide damytatynyn atap ótken.
Áńgime barysynda zamanaýi sport qozǵalysyndaǵy sýmonyń róli sóz bolǵan. Bul sport túri qazirdiń ózinde Dúniejúzilik oiyndar halyqaralyq qaýymdastyǵynyń (IWGA) baǵdarlamasyna engizilgen jáne birtindep Olimpiada oiyndaryna qosylýǵa jaqyn ekeni aitylǵan.
Sondai-aq, sýmonyń álemdik damý úrdisine erekshe nazar aýdarylǵan. Búginde bul sport túrimen shamamen 85 ulttyq federatsiia ainalysady. Sonymen qatar, ár elde jankúier sany artyp keledi.
Odan soń Hakýho Sionyń sapary Almatyda jalǵasqan. Ol Shymbulaqqa baryp, qazaqtyń ulttyq kiimin kiip, sýretke túsken. Kadrlardy óziniń áleýmettik jelidegi paraqshasynda jariialady.
Aita keteiik, Hakýho Sio (shyn esimi - Mýnhbatyn Davaajargal) - tarihtaǵy eń ataqty sýmo balýany, 69-shy iokodzýna. Onyń qorjynynda 45 chempiondyq ataq bar.
2021 jyly sporttyq mansabyn aiaqtady. Sodan keiin ol Japoniia azamattyǵyn alyp, "Miiagino-beia" sýmo mektebin basqarýdy qolǵa aldy.
