"Teńizshevroil" kompaniiasynyń qoǵammen bailanys jónindegi bas menedjeri Rzabek Artyǵaliev kásiporyndaǵy ázir ahýal týraly aityp berdi dep habarlaidy Dalanews.kz.
Jýrnalister saýalyna jaýap bergen kompaniia ókili karantin kezindegi saqtyq sharalaryna egjei-tegjeili toqtaldy.
"Kásiporyn basshylyǵy sanitarly-epidemiologiialyq talaptarǵa erekshe mán beredi. Qorǵanys erejesin saqtamaǵan merdiger kompaniialarmen aradaǵy kelisimshartty úzýge týra keledi.
Áitse de koronavirýs infektsiiasynyń tabylǵanyna qaramastan jumysty toqtatqan joqpyz. "Keleshek keńeiý", "Uńǵyma erneýiniń qysymyn basqarý" sekildi jobalardy qaýipsiz túrde ári merziminde tapsyrý jumysy júrgizilýde", – dedi ol Atyraý oblystyq kommýnikatsiialar qyzmetinde ótken kezdesýde.
Onyń atap ótkenindei Teńizde indettiń taralýyn tejeý maqsatynda birqatar shara qabyldanǵan. Sonyń biri - jumysshylardy jeke-jeke toptarǵa bólý.
"Jumys toby músheleriniń biri virýs juqtyrǵan jaǵdaida, basqa bir jumys toby olardyń ornyn almastyrýǵa ázir bolady. Bul óz kezeginde óndiristik qyzmetti toqtatpaýǵa múmkindik beredi", – deidi kompaniia ókili.
Kásiporyn jumysshylary meditsinalyq maska taǵýǵa jáne jeke tazalyqty saqtaýǵa mindetti.
"Osynaý talaptyń qatań saqtalýyn merdiger kompaniialardyń qulaǵyna quidyq. Ilgeride aitqandai bul erejege júrdim-bardym qaraǵan merdigerlerge shara qoldanamyz. Qajet bolsa tipti kelisimshartty toqtatamyz", – deidi Rzabek Artyǵaliev.
