Kollektorlar týraly telenovella qazaqstandyqtardy túsirilim kezinde de bei-jai qaldyrmady. Onyń tusaýkeseri 19 tamyz kúni saǵat 22.00-de bolady.
Biyl kúzde "31 arnanyń" kórermenderin otandyq serialdar, kópten kútken realiti-shoýlardyń jańa maýsymdary, qazaqstandyq ekskliýziv kino, sondai-aq sheteldik úzdik kórkem filmder men animatsiialardyń premerasy kútip tur. Bul oraida, televiziialyq jańa maýsym búgin saǵat 22.00-de arnanyń óz týyndysy – "Qaryz" serialynyń premerasymen bastalady.
"Jaz boiy 31 arna ujymy ártúrli janrdaǵy serialdardy túsirdi. Olardyń qatarynda "Narhoz. Stýdent kóke", otandyq televiziiadaǵy sátti realiti-shoýlardyń biri – "Kelinder báigesiniń" jalǵasy bar, osymen bul – segizinshi maýsym. 31 arnanyń jańa maýsymy "Qaryz" atty 10 seriialy dramamen ashylady. Ol 19 tamyz, iaǵni búgin keshke praim-taimda kórsetiledi", – dedi 31 arna bas direktorynyń orynbasary Anar Ibraeva.
"Qaryz" serialynyń siýjeti aýyr jaraqattan keiin sporttyq mansabyn aiaqtaýǵa májbúr bolyp, óziniń ómirdegi jańa ornyn izdegen boksshyǵa negizdelgen. Kóp uzamai ol kollektorlyq agenttikke jumysqa turady. Qyzmet barysynda keiipkerimiz seriktesimen birge adamdardan qaryzdyń qandai qatal joldarmen óndiriletinin kóredi. Onyń ártúrli ádisi bar. Boryshkerlermen árbir kezdesý nesieni qaitarýshylar úshin, klientter úshin de naǵyz synaqqa ainalady. Osyndai jumys barysynda bir kúni olar anasynan aiyrylǵan kishkentai qyzdy jolyqtyrady. Bul oqiǵa olardyń jan dúniesiniń eń názik qylyn qozǵap, janashyrlyq sezimin oiatady. Bir sátte keiipkerler qyzǵa kómektesýge de daiyn bolady. Olardyń aldynda naǵyz dilemma tur: kómek qolyn sozyp, tapsyrmany oryndai almaý nemese nusqaý boiynsha áreket etip, adam ómirin qurban etý.
Serial árbir aqshalai qaryzdyń artynda onyń somasyna qaramastan, jeke hikaialary men problemalary bar shynaiy adamdardyń turǵanyn anyq kórsetedi.
"Siýjet shynaiy oqiǵalarǵa negizdelgen. Filmde kórsetilgen jaǵdailar men keiipkerler elimizdiń azamattarynyń prototipi. Serialda halyqtyń qaryzǵa shamadan tys júktelýi, qarjylyq saýatsyzdyq, turmystyq zorlyq-zombylyq, urpaqtar arasyndaǵy kikiljiń máseleleri kórsetiledi. Bul – qazirgi qazaq qoǵamy ómir súrip jatqan shynaiy álem. Bul hikaiadan ár adam ózin nemese óziniń tóńiregin kóre alady. Serialdyń basty maqsaty – qazaqstandyqtarǵa bir-biriniń máselesine bei-jai qaramaý, ózgeni syilaý, bilimge umtylý ideiasyn jetkizý", – dedi serialdyń stsenarisi Nurjigit Haidar.
Qazaqstandyqtardy nemquraily dep aiyptaýǵa bolmaitynyn aita ketý kerek. Bul túsirilim kezinde anyq belgili boldy.
"Kollektorlar qaryzyn óteý úshin kópbalaly otbasynyń páterin tartyp alatyn sahnany túsirý kezinde túsirilim bolǵan ǵimarattyń turǵyndary janashyrlyq tanytyp, "kórshilerdi" jaqtap shyqty. Bei-jai qaramaityn adamdar serialdyń túsirilimi ekenin bilgen soń ǵana sabasyna tústi", – dedi serialdyń qoiýshy rejisseri ári prodiýseri Azamat Erjanuly.
"Qaryz" serialynyń bas keiipkerlerin ne kútip tur? 19 tamyzdan bastap saǵat 22:00-de 31 arnasynda "Múkjidek shárbaty" serialynan keiin tamashalańyz!
