"Qazaqstan Respýblikasy azamattarynyń borysh júktemesin azaitýǵa bólingen qarajatty paidalanýdyń keibir máseleleri týraly" úkimettiń 2019 jylǵy 15 shildedegi № 520 qaýlysyna ózgerister engizýge arnalǵan qujattyń jobasy "Ashyq NQA" portalynda jariialandy.
Áleýmettik jaǵynan osal azamattar túrli sebeptermen ómirlik qiyn jaǵdaiǵa tap bolyp, óz atyna alǵan kredittik mindettemelerin oryndai almai otyr.
"Qoldanystaǵy qaýlyda kózdelgen merzimder aiaqtalǵannan keiin memlekettik organdardyń aqparattyq júielerinde derekterdiń bolmaýyna bailanysty bereshegi ótelmei qalǵan adamdar anyqtaldy", - delingen túsiniktemede.
Osyǵan orai "Qazaqstan Respýblikasy azamattarynyń borysh júktemesin azaitý týraly" Qazaqstan Respýblikasy prezidentiniń 2019 jylǵy 26 maýsymdaǵy № 34 jarlyǵynyń kúshine iligetin adamdardy tolyqtai qamtý maqsatynda jarlyqty iske asyrý merzimderin uzartý usynylyp otyr.
Kredittik amnistiianyń merzimin uzartý oǵan ilinbei qalǵan azamattardy qamtyp, olardyń qarjylyq jaǵdaiyn jaqsartýǵa múmkindik beredi.
Qujattyń jobasy 14 maýsymǵa deiin talqylaýǵa shyǵarylyp otyr.
Aita keteiik, kredittik raqymshylyq kezinde áleýmettik jaǵynan osal toptardyń tutynýshylyq kreditteri boiynsha negizgi qaryzdyń 300 myń teńgesi óteldi. Biraq kredittiń jalpy somasy 3 millionnan aspaýy shart.
