Sottalǵan – Ózbekstan azamaty Bekniiazov otbasymen birge SQO M.Jumabaev aýdanynda turǵan. Buǵan deiin politsiia departamentinde er adamnyń mas kúiinde qyzy men ulyn zorlaǵany týraly aitylǵan edi.
Qylmystyq is sotta jabyq qaraldy. SQO qylmystyq ister jónindegi mamandandyrylǵan aýdanaralyq sotynyń málimetinshe, er adam 2020 jyldan bastap biylǵy 30 qańtarǵa deiin kámelet jasyna tolmaǵan qyzy men ulyn birneshe ret zorlaǵan.
Sottalýshynyń kinási jábirlenýshilerdiń, jábirlenýshilerdiń zańdy ókiliniń, kýágerniń aiǵaqtarymen, saraptamalardyń qorytyndylarymen tolyq dáleldendi. Sottalýshy men onyń advokaty aiyptaýmen kelispedi, aqtaýdy surady.
Sot jaýapkershilik pen jazany aýyrlatatyn mán-jai retinde qylmystyń mas kúiinde jasalǵanyn esepke aldy. Sot er adamnyń jazasyn jeńildetetin mán-jailardy anyqtaǵan joq.
«Jasalǵan qylmystardyń asa aýyr qylmystar sanatyna jatatynyn jáne qoǵamdyq qaýiptilik dárejesin, istiń mán-jailaryn, kináliniń jeke basyn eskere otyryp, sot barynsha qatań jaza taǵaiyndaý qajettigi týraly qorytyndyǵa keldi. Sot er adamǵa pedagogikalyq jáne kámeletke tolmaǵandarmen jumys isteýge bailanysty laýazymdardy atqarýǵa ómir boiyna tyiym sala otyryp, ony ómir boiyna bas bostandyǵynan aiyrý jazasyn kesti» delingen qylmystyq ister jónindegi mamandandyrylǵan aýdanaralyq sottyń baspasóz habarlamasynda.
Sottalǵan jazasyn tótenshe qaýipsizdik mekemesinde óteidi. Sot úkimi zańdy kúshine engen joq.
