Memleket basshysy Sybailas jemqorlyqqa qarsy is-qimyl agenttiginiń tóraǵasy Ashat Jumaǵalidy qabyldady, – dep habarlaidy Dalanews.kz.
Prezident agenttiktiń elimizde sybailas jemqorlyqqa qarsy atqaryp jatqan jumysymen tanysty. Memleket basshysyna biylǵy birinshi toqsandaǵy vedomstvo qyzmetiniń nátijeleri men «Zań jáne tártip» tujyrymdamasyn iske asyrý jóninde baiandaldy.
Ashat Jumaǵalidyń aitýynsha, jyl basynan beri sybailas jemqorlyqqa qatysty 521 qylmys tirkelgen. Atap aitqanda, 257 laýazymdy tulǵa áshkerelendi, olardyń 141-i – ártúrli deńgeidegi basshylar. Sotqa 366 qylmystyq is jiberildi.
Prezidentke biyl memleket paidasyna 15 milliard teńge ótelgeni týraly málimet berildi. 2022 jyldan bastap jalpy somasy 1,13 trillion teńge bolatyn aktivter qaitarylǵan.
Memlekettik satyp alý men qarjynyń maqsatty paidalanýyna monitoring júrgizý barysynda 21,2 milliard teńgeniń negizsiz jumsalýyna jol berilmedi.
Memleket basshysyna týrizm salasyndaǵy sybailas jemqorlyq táýekelderine syrtqy taldaý júrgizilgeni, onyń nátijesi boiynsha ýákiletti organǵa usynymdar engizilgeni jaiynda aityldy.
Agenttik tóraǵasy avtokólik joldary qurylysynda «aqshany boiaý» jobasyn iske asyrý jóninde aitty.
Qasym-Jomart Toqaevqa «Zań jáne tártip», «Adal azamat» tujyrymdamalaryna sáikes sybailas jemqorlyqqa qarsy mádenietti qalyptastyrý baǵytyndaǵy bastamalar tanystyryldy. Ártúrli formattaǵy 3 myńǵa jýyq is-shara ótkizilip, oǵan 450 myńnan astam azamat qatysty. «Sybailas jemqorlyqqa qarsy volonterlik» jobasy iske asyrylyp jatyr. Agenttik elimizdiń jetekshi joǵary oqý oryndarynyń Akademiialyq adaldyq ligasymen jumysty qolǵa aldy.
Prezidentke halyqaralyq yntymaqtastyq, sonyń ishinde EYDU jáne Sybailas jemqorlyqqa qarsy kúres jónindegi memleketter tobymen seriktestik jaiynda aqparat berildi. Agenttik Halyqaralyq sybailas jemqorlyqqa qarsy organdar qaýymdastyǵymen berik bailanys ornatqan jáne biylǵy aqpan aiynda atalǵan uiymnyń Atqarý komiteti quramyna kirdi.
Byltyr Transparency international sybailas jemqorlyqty qabyldaý indeksine sai atqarylǵan jumystardyń nátijesinde Qazaqstan 40 balǵa ie bolyp, 180 eldiń arasynda 88-orynǵa turaqtady.
Kezdesý sońynda Prezident elimizdegi sybailas jemqorlyqqa qarsy is-qimyldardy odan ári jalǵastyrý, tamyr jaiǵan qylmystyq tizbektiń jolyn kesý jáne qoǵamda sybailas jemqorlyqqa qarsy mádeniet qalyptastyrý jóninde birqatar tapsyrma berdi.
