Jańa jyldan bastap Qazaqstanda jańa Salyq kodeksi kúshine enedi. Bul ózgerister tek kásipkerlerge ǵana emes, qarapaiym azamattardyń da kúndelikti shyǵyndaryna tikelei áser etedi. Salyq salasyndaǵy sarapshy, býhgalter Aijamal Ábdikerimova Baseimiz Live YouTube arnasyna bergen suhbatynda reformanyń máni men negizgi erekshelikterin túsindirdi, dep habarlaidy Dalanews.kz.
Sarapshynyń aitýynsha, reformanyń negizgi maqsaty kóleńkeli biznesti azaityp, salyq júiesin ońtailandyrý. Buǵan deiin elde 8 túrli salyq rejimi bolǵan. Endi olar qysqartylyp, tek jalpyǵa ortaq rejim, jeńildetilgen rejim jáne aýyl sharýashylyǵy salasyna arnalǵan rejim ǵana qalady. Sonymen qatar taksi júrgizýshiler, shashtarazdar, páterin jalǵa beretin azamattar sekildi shaǵyn tabys tabatyn tulǵalarǵa arnalǵan arnaiy múmkindik saqtalady. Aiyna 1,3 million teńgege deiin tabys tabatyndar IP ashpai-aq jumys istei alady. Bul jaǵdaida azamat ai saiyn bir ǵana tólem jasaidy, onyń 4 paiyzy zeinetaqy men meditsinalyq saqtandyrýǵa avtomatty túrde bólinedi. Alaida sarapshy bul rejimniń zeinetke shyǵý nemese dekretke shyǵýdy josparlaǵan adamdar úshin tiimsiz ekenin atap ótti.
“Eń kóp talqylanyp jatqan ózgeristiń biri — qosymsha qun salyǵynyń ósýi. Buryn QQS 12% bolsa, endi ol 16%-ǵa deiin artady. Bul óz kezeginde banktik qyzmetterdiń, balabaqsha men úiirmelerdiń, túrli servistik qyzmettiń qymbattaýyna ákelýi múmkin. Sonymen qatar turǵyn úi baǵasynyń ósýi de kútiledi. Buǵan deiin QQS-tan bosatylǵan qurylys kompaniialary endi bul salyqty tóleýge mindetteledi”, — deidi ol.
Sarapshynyń aitýynsha, qosymsha salyq aýyrtpalyǵy páter baǵasyna tikelei qosylady.
Jańa kodekske sáikes bankterdiń korporativtik tabys salyǵy 15%-dan 25%-ǵa ósedi. Bul bank qyzmetteriniń qymbattaýyna ákelýi múmkin. Sonymen qatar jekemenshik balabaqsha men mektepter sekildi áleýmettik sala kásipkerleri 2026 jyldan bastap salyq tólei bastaidy.
Endi jeke tulǵa turǵyn úidi eki jyldyń ishinde satyp, paida tapsa 10% salyq tóleidi. Buryn bul merzim bir jyl bolatyn. Al úsh jyldan keiin satylǵan múlikke salyq salynbaidy. Sarapshy memleket tarapynan baqylaý kúsheietinin de eskertti. Onyń aitýynsha, múlik pen kólikke qatysty barlyq operatsiia avtomatty túrde baqylanady, al salyq tólemegen azamattardan bereshek úsh jylǵa deiin keri óndirilip alynady.
Aijamal Ábdikerimovanyń sózinshe, jańa Salyq kodeksi tek bizneske ǵana emes, búkil qoǵamǵa áser etetin reforma.
“Qyzmet baǵasy ósedi, turǵyn úi qymbattaidy, bank operatsiialary da qymbat bolýy múmkin. Sondyqtan ár azamat bul ózgeristerdi aldyn ala bilip, daiyn bolǵany jón”, — deidi sarapshy.
