Qazaqstan musylmandary dini basqarmasy (QMDB) 2025 jyldyń pitir sadaqa mólsherin eki keli unnyń ortasha baǵasyna negizdei otyryp, 655 teńge dep belgiledi, dep habarlaidy Dalanews.kz.
QMDB bekitken 2025 jyldyń dini kúntizbege sáikes, Ramazan aiy 1 naýryzda bastalady. Qadir túni 26-27 naýryzǵa tuspa-tus keledi. Oraza ait 30 naýryzda ótse, Qurban ait merekesi 6 maýsymda bastalady.
Pitir sadaqa – árbir musylman úshin Ramazan aiynda berilýi tiis mindetti sadaqa. Ol jan basyna eseptelip, ár otbasy múshesi úshin tólenedi.
Eske salaiyq, 2025 jyldyń dini kúnder kestesine sáikes, biyl Ramazan aiynyń alǵashqy kúni kóktemniń birinshi kúnine, iaǵni 1 naýryzǵa sáikes keletinin habarlaǵan edik.
"Degenmen jańa aidyń kórinýine bailanysty bul kúnder bir kún alǵa ne bir kún keiin shegerilýi múmkin ekenin umytpaý kerek", - dep habarlady QMDB.
Dini basqarma Ramazan aiy bastalmai turyp, ótken jyldaǵy qaza bolǵan oraza kúnderin tolyqtyrý keregin eskertti.
Sonymen qatar Astana qalasy "Dinderdi zertteý ortalyǵynyń" islamtanýshy-lektory Arman Nurahmetuly Ramazan aiyna bailanysty birqatar keńesin usyndy.
Kim oraza ustaýǵa mindetti?
Orazanyń musylmandarǵa paryz bolatyn sharttary:
- baliǵat jasyna jetý;
- aqyl esi durys bolý;
- oraza ustaýshynyń densaýlyǵy jaramdy bolýy;
Ramazan aiynda kúndelikti kúnde orazany qalai ustaý kerek?
Tań atqannan (tań namazynyń bastalý ýaqyty) kún batqanǵa deiin (keshki aqsham namazynyń bastalýyna deiin). Osy ýaqyt ishinde ishýge, tamaq jeýge jáne jubaiyńyzben jynystyq qatynasqa túsýge bolmaidy. Demek, aqsham namazy ýaqyty kirgennen bastap, tań namazyna deiin (keshki jáne túngi ýaqyt aralyǵynda), atalmysh tyiymdar ruqsat etiledi;
Oraza ustaýshynyń sáresi men orazaǵa niet etýi
Oraza ustaýshynyń sáresi (sýhýr) – Ramazan aiyndaǵy oraza kezindegi tań namazy ýaqyty aldyndaǵy aýyz bekitý (tamaqty iship-jeý).
Niet - Rabbynyń ámirin oryndaý maqsatynda, júrekte oraza ustaýǵa sheshim qabyldaý. Niettiń orny júrek, biraq nietti aýyzsha aitýǵa (bildirýge) bolady.
Niet aitý (bildirý) nusqasy: «Niet ettim Allah Taǵala rizalyǵy úshin tańnan keshke deiin ramazan aiynyń orazasyn ustaýǵa». Nemese QMDB – nyń resmi saittarynyń nusqalaryn qoldanýǵa bolady. Óz erikterimen arabshasyn nemes qazaqshasyn aitsańyz bolady.
Aýyz ashar (iftar) – Ramazan aiynyń oraza kezindegi keshki asy. Aýyz ashar aldynda duǵa jasaýmenen bastaǵany jaqsy.
Duǵa jasaý nusqasy: «Iá Allah Taǵala, Sen úshin oraza ustadym, saǵan niet ettim, saǵan sendim. Seniń bergen nesibeńmen aýyz ashtym. Erteńgi kúnniń orazasyna da niet ettim. Bizdiń ótken bilip te, bilmei istegen kúnálarymyzdy keshire kór». Nemese QMDB – nyń resmi saittarynyń nusqalaryn qoldanýǵa bolady.
Tań sáresine uiyqtap qalsam, sol kúngi oraza oraza bolyp sanala ma?
Tań sáresinde as jeý óte qajet. Eger siz sáresine uiyqtap qalsańyz, biraq siz uiyqtar aldynda kelesi kúni oraza ustaýdy josparlasańyz (niet etseńiz), uiqydan turǵannan keiin siz ádettegidei orazańyzdy jalǵastyrai beresiz. Tań sáresinde tamaq ishpegenińiz úshin alańdamańyz. Orazańyz buzylmaidy.
Oraza kezindegi tyiymdary, ony buzatyn jaǵdaiattary men qazalarynyń ótelinýi QMDB-nyń resmi saittarynan bilýińizge bolady.
