Prezidenttiń tapsyrmasyna sáikes, 2024 jyly Qazaqstanda 18,96 mln. sharshy metr turǵyn úi salyndy. Bul – Qazaqstan táýelsizdik alǵannan beri turǵyn úi qurylysyndaǵy rekordtyq kórsetkish.
2024 jyldyń qorytyndysy boiynsha 172 089 baspana paidalanýǵa berildi. Onyń 39 064 jeke úi. Óńirler arasynda Shymkent qalasy, Pavlodar, Túrkistan jáne Qyzylorda oblystary qurylys qarqyny boiynsha kósh bastap tur.
2024 jyl Qazaqstannyń turǵyn úi saiasaty úshin betburys kezeńi boldy. Qarasha aiynda Prezident «Turǵyn úi zańnamasyn reformalaý týraly» Zańǵa qol qoidy. Ol azamattardyń turǵyn úi jaǵdaiyn jaqsartýǵa memlekettik qoldaý kórsetý tetikterin jetildiredi. «Otbasy banki» «Bir tereze» qaǵidaty boiynsha muqtaj azamattar arasynda turǵyn úidi tirkeý jáne bólýmen ainalysatyn tolyqqandy damý institýtyna ainalady. Reforma turǵyn úi alý kezegindegi azamattarǵa baspana berý protsesiniń ashyqtyǵyn arttyrý maqsatynda júrgizildi.
Sondai-aq osy zań aiasynda jalǵa beriletin memlekettik turǵyn úilerde turatyn 71 myńǵa jýyq azamatqa páterlerin jekeshelendirýge múmkindik berildi. Jaldamaly turǵyn úi ieleriniń kópshiligi halyqtyń áleýmettik osal toptary, UOS ardagerleri, múgedektigi bar azamattar, kóp balaly otbasylar, jetim balalar jáne t.b.
Áleýmettik osal toptary sanatyndaǵy muqtaj azamattar úshin ákimdikter 20 myńnan astam páter satyp alyndy. Onyń 13 myńǵa jýyq otbasy alǵash ret jeke baspananyń iesi atandy.
Odan bólek, 2300 azamatqa ipoteka boiynsha bastapqy jarnany jabý úshin turǵyn úi sertifikattary túrinde 2,6 mlrd teńge bólinip, 10,4 myń azamatqa turǵyn úidi jalǵa alǵany úshin jaldaý aqysynyń bir bóligin jabý úshin turǵyn úi tólemderi sýbsidiialandy.
«Naýryz» jáne «Otaý» memlekettik baǵdarlamalary aiasynda 2024 jyly 10 myńǵa jýyq otbasy turǵyn úi jaǵdaiyn jaqsartty. 64 myńǵa jýyq otbasyn qoldaýǵa memleket 1 trln. teńge bólgen. Memleket jaldaý aqysyn sýbsidiialaý jáne jeńildetilgen ipotekalyq nesieler berý boiynsha qoldaý kórsetýdi jalǵastyrady.
2025 jyly elimizde 19 mln. sharshy metr nemese 175 myń turǵyn úi, 2029 jylǵa qarai 111 mln. sharshy metr salý josparlanýda.
Ónerkásip jáne qurylys ministrligi jergilikti atqarýshy organdarmen birlesip Prezidenttiń árbir qazaqstandyqtyń qolaily jaǵdaida ómir súrýin qamtamasyz etýge baǵyttalǵan tapsyrmalaryn belsendi túrde júzege asyrýda.
