Sintetikalyq esirtkini ótkizgen jáne qylmystyq kiristi zańdastyrǵan kúdikti Grýziiadan ekstraditsiialandy, dep habarlaidy dalanews.kz.
Qazaqstan Respýblikasynyń Bas prokýratýrasy men Ishki ister ministrliginiń Interpol qyzmetkerleri Qazaqstannyń Grýziiadaǵy Elshiliginiń qoldaýymen atalǵan elden asa iri mólsherde psihotroptyq zattardyń zańsyz ainalymymen, sondai-aq qylmystyq kiristerdi zańdastyrýmen ainalysatyn uiymdasqan qylmystyq topqa qatysqany úshin qylmystyq jaýapkershilikke tartý maqsatynda Qazaqstan azamatyn ekstraditsiialady.
Tergeý anyqtaǵandai, atalǵan adam qylmystyq toptyń múshesi bola otyryp, Almaty oblysy aýmaǵynda asa iri kólemde esirtki óndirisin uiymdastyrǵan. Keiinnen daiyndalǵan psihotroptyq zattardyń tektesteri osy oblys pen Almaty qalasynyń aýmaǵynda jasyryn túrde taratylǵan.
Tergep-tekserý barysynda qylmystyq toptan 10 kelige jýyq psihotroptyq zattar (mefedron) alyndy. Qylmystyq áreket nátijesinde alynǵan zańsyz kiristi qaskúnemder 1,8 mlrd teńgeden astam somada ártúrli qarjylyq operatsiialar, onyń ishinde kriptoalmastyrǵyshtardy paidalana otyryp, jáne qosymsha 600 million teńgeden astam somaǵa jyljymaityn múlikti, biznes obektilerin jáne kólik quraldaryn satyp alý arqyly zańdastyrǵan. Bul aktivterge memleket paidasyna aýdarý maqsatynda tyiym salyndy.
Qazirgi ýaqytta qylmystyq top músheleriniń bir bóligi sotqa berilip, olar boiynsha sot talqylaýy júrgizilýde, al onyń keibir músheleri, onyń ishinde kúdikti qylmystyq qýdalaý organdarynan jaltaryp, halyqaralyq izdestirýge jariialanǵan.
Aǵymdaǵy jyldyń qańtarynda ol Grýziia aýmaǵynda ustalyp, ol jerden Bas prokýratýranyń suraýy boiynsha Qazaqstanǵa berildi. Qazirgi tańda tulǵa tergeý izoliatoryna qamaldy.
Oǵan taǵylǵan qylmystardy jasaǵany úshin múlki tárkilenip, 20 jylǵa deiingi merzimge bas bostandyǵynan aiyrý túrindegi jaza kózdelgen.
