Jasóspirimderdiń onlain-platformalardy baqylaýsyz paidalanýy olardyń psihologiialyq jaǵdaiyna, uiqy sapasyna jáne zeiinine keri áserin tigizedi. «Ádilet» fraktsiiasynyń depýtaty Janarbek Áshimjan Quryltaida Premer-Ministr Oljas Bektenovke saýal joldap, 16 jasqa deiingi kámeletke tolmaǵandardyń áleýmettik jelilerde tirkelýin zańnamalyq deńgeide shekteýdi usyndy, dep habarlaidy dalanews.kz.
Buǵan mektep oqýshylary arasyndaǵy internettegi býllingtiń eki ese ósýi jáne gadjetke táýeldilikke qatysty alańdatarlyq statistika sebep boldy. Jas shekteýinen bólek, depýtattar balalardyń derbes derekterin qorǵaý júiesin qurýdy jáne mektepterde mediasaýattylyq boiynsha mindetti kýrstar engizýdi usynady.
Memleket basshysy Qasym-Jomart Toqaev 16 jasqa tolmaǵan balalardyń áleýmettik jelige tirkelýine zań arqyly tyiym salý bastamasyn qoldady. Másele balanyń áleýmettik jelide otyrýynda ǵana emes, onyń ýaqyty men jadyn joǵaltýynda. Áleýmettik jelige shamadan tys áýestik balanyń kitap oqýyna, sportpen ainalysýyna, otbasymen qarym-qatynasyna jáne sabaqqa daiyndalýyna bólinetin ýaqytty qysqartady. Alaida zań qabyldaýmen másele sheshilmeidi. Balanyń jasyn qalai anyqtaimyz? Jeke derekterin kim jáne qalai qorǵaidy? Shekteýdi ainalyp ótetin jalǵan akkaýnttarǵa tosqaýyl qalai qoiylady? Al bilim alýǵa qajetti tsifrlyq platformalarǵa qoljetimdilik qalai saqtalady? Memleket basshysy da zań qabyldaýmen qatar onyń naqty oryndalý tetigin aldyn ala oilastyrý qajettigin atap ótti, - deidi depýtat.
Osyǵan bailanysty Janarbek Áshimjan úkimetten 16 jasqa deiingi balalardyń áleýmettik jelige tirkelýine shekteý qoiý tetigin naqtylaýdy, balalardyń jáne jeke tsifrlyq derekteriniń qaýipsizdigin qamtamasyz etýdi, mektepterdiń tsifrlyq gigiena, media saýat jáne áleýmettik jelini qaýipsiz paidalaný daǵdylaryn júieli oqytýdy surady.
