Almaly aýdandyq sotynda Almaty mádenıet basqarmasynyń  burynǵy orynbasary Naılá Mýlúkovaǵa qatysty is qaıta qaralyp jatyr. Ol búdjet qarajatyn jymqyrý jáne qyzmettik ókilettigin asyra paıdalaný baby boıynsha aıyptalýda, dep habarlaıdy Dalanews.kz.

“GosArhıv” telegram arnasynyń málimetinshe, Mýlúkova “Bezendirý KZ” kompanıasymen zańsyz memlekettik satyp alýlar jasady degen kúdikke ilingen. Tergeý málimetteri boıynsha, bul fırma bir jyl ishinde 456 mln teńgeniń tenderin jeńip alǵan, alaıda is júzinde merekelik is-sharalarǵa jumsalǵan qarajat áldeqaıda az bolǵan. Nátıjesinde memleketke 92,8 mln teńge kóleminde zalal keltirilgen bolýy múmkin.

Qaıda qansha qarajat jumsalǵan?

• 2023 jylǵy Jańa jyl – 64,9 mln teńge

• Naýryz (eki lot) – 132 mln teńge

• Qala kúni – 72,8 mln teńge

• Bı festıvali jáne “Eńlik gúl” syılyǵy – 33,6 mln teńge

• “Orkestrler festıvali” – 48,7 mln teńge

• “Otyrar Sazy&iFLI” konserti – 37 mln teńge

• “Apple Fest” mádenı festıvali – 67,5 mln teńge

“Sońǵy sot otyrysynda Almaty mádenıet basqarmasy Mýlúkovadan 125,6 mln teńge óndirip alýdy talap etetinin málimdedi. Alaıda bul somanyń qalaı eseptelgeni túsindirilmeldi”, — deıdi derekkóz.

Sot prosesiniń uzaqqa sozylýy

İs tórt aı boıy toqtap turǵan, sebebi qorǵaýshy tarap aıyptaýlardyń negizsiz ekenin dáleldeý úshin qaıta saraptama júrgizýdi talap etken. Sońǵy sot otyrysynda Mýlúkovanyń advokaty jańa saraptama qorytyndysyn usyndy, onda bastapqy kelisimsharttarda kórsetilgen sandar tolyqtaı rastalǵan.

Sottaǵy shıelenis

• Qorǵaýshy tarap sot pen aıyptaýshylardy qylmystyq-prosestik normalardy buzdy dep birneshe ret synǵa aldy.

• Jábirlenýshi taraptyń ókili advokattyń kásibı etıkany buzǵanyn aıtyp, ony jaýapqa tartýdy talap etti.

• Sot eki taraptyń da ótinishterin qanaǵattandyrmaı, isti qaraýdy jalǵastyrýǵa sheshim qabyldady.

Naılá Mýlúkova 125 mln teńgeni jymqyrdy degen aıyptaýmen kelispeı, barlyq memlekettik satyp alýlar zań aıasynda ótti dep málimdedi. Al mádenıet basqarmasy bul qarjynyń tıimsiz jumsalǵanyn alǵa tartyp, qarajatty qaıtarýdy talap etýde. Almatyda ótip jatqan bul sot isi joǵary deńgeıdegi eń daýly jemqorlyq isteriniń birine aınalýy múmkin.