QMA Bas prokýratýranyń úilestirýimen «Asar Baspana» qarjy piramidasynyń qyzmetin toqtatty, dep habarlaidy Dalanews.kz.
Ol tutynýshylyq kooperativ retinde jasyrynyp jumys istegen.
Tergeý barysynda Týǵanbaev N.M. bastaǵan piramida uiymdastyrýshylary, 86 myńnan astam azamattan 12,4 mlrd teńge tartqan, esesine ai saiyn 30%-ǵa deiin tabys ýáde etken.
Shyn máninde, naqty biznes bolmaǵan, tólemder jańa qatysýshylardyń salymdary esebinen júzege asyrylǵan.
Nátijesinde Týǵanbaev pen onyń seriktesteri 3,8 mlrd teńge qarajatty zańsyz ielengen.
Kúdiktiler salymshylardy adastyryp, Almaty qalasynda qurylys materialdaryn óndirý, tigin tsehy men turmystyq jáne meditsinalyq tehnika zaýyty jumys istep jatqandyǵyn málimdegen. Shyndyǵynda, ónimder úshinshi tarap jetkizýshilerinen satyp alynyp«Asar Baspana» logotipimen tańbalanǵan.
2024 jyly jeltoqsan aiynan bastap, piramidaǵa degen senim azaia bastaǵan kezde, uiymdastyrýshylar avtosalon ashyp, resmi dilerlermen áriptestik ornattyq degen jalǵan aqparat taratqan. Shyn máninde, avtokólikter salymshylardyń aqshasyna satyp alynyp Týǵanbaevtyń týystaryna rásimdelgen.
Piramidany áshkere qylatyn jaǵdailar týyndaǵan tusta, Týǵanbaev N.M. 8 aqpan kúni «Asar Baspana» saityn tehnikalyq rejimge aýystyrǵan. Bul qylmystyq áreketti jasyrý maqsatynda jasaldy.
Alaida, tergeý barysynda serverlik derekter qalpyna keltirildi. Sait derekterine sáikes, «Gold» deńgeiine jetken 15,5 myń salymshynyń tek bireýine ǵana páter berilgen.
«Platina» baǵdarlamasy boiynsha 15 myń úmitkerdiń arasynan tek bir salymshyǵa ǵana kólik berilgen.
Eske salaiyq, 2025 jylǵy 9 aqpanda 49 keńsede jáne 81 kúdiktiniń turǵylyqty jerinde tintý júrgizildi.
Onyń nátijesinde 1,1 mlrd teńge, Toyota Land Cruiser 300 jáne Lexus 570 siiaqty 10 premiým-klasstaǵy avtokólikter tárkilendi, olar Týǵanbaev pen onyń jaqyndaryna rásimdelgen.
Sonymen qatar, Aqtaý qalasynda Týǵanbaev N.M.-nyń baýyrynyń úiinen kooperativtiń esepshottarynda bolýy tiis 945 mln teńge qolma-qol aqsha tabyldy.
1,2 mlrd teńgeden astam somaǵa shottar buǵattalyp, tyiym salynǵan.
2025 jylǵy 11 aqpanda Týǵanbaev N.M. men Baitasov N-ǵa qatysty 2 aiǵa qamaýǵa alý túrindegi bultartpaý sharasy qabyldandy.
Sotqa deiingi tergeý jalǵasýda.
