Oqý-aǵartý ministrligi "Abai ulttyq mektebine" qatysty jariialanǵan aqparatqa jaýap berip, bilim ordasyndaǵy jaǵdai Orta bilim komitetiniń baqylaýynda ekenin málimdedi. Vedomstvo mekteptiń basshysyz qalǵany týraly aqparatty joqqa shyǵardy, dep habarlaidy dalanews.kz.
Ministrliktiń málimetinshe, qazir direktordyń mindetin atqarýshy taǵaiyndalǵan jáne oqý protsesiniń úzdiksiz júrýi qamtamasyz etilgen. Al mekteptiń burynǵy basshylyǵy 2026 jylǵy mamyr-maýsym ailarynda júrgizilgen ishki memlekettik aýdit aiaqtalǵannan keiin óz erkimen qyzmetinen ketken.
Aýdit 2023 jylǵy 1 qańtar men 2025 jylǵy 31 jeltoqsan aralyǵyn qamtyǵan. Tekserý nátijesinde jalpy somasy 10,8 mlrd teńgeden asatyn zańbuzýshylyq anyqtalǵan. Onyń 10,4 mlrd teńgesi qarjylyq buzýshylyqtarǵa qatysty.
"Atap aitqanda, 10,2 mln teńge biýdjetke qaitarylýǵa, 10,4 mlrd teńge qalpyna keltirilýge tiis. Sonymen birge 370,6 mln teńge kóleminde rásimdik buzýshylyq anyqtaldy", – delingen ministrlik habarlamasynda.
Aýdit qorytyndysy boiynsha sheshim qabyldaý úshin quqyq qorǵaý organdaryna tórt material joldanǵan. Budan bólek, ákimshilik quqyq buzýshylyqtar boiynsha 24 aiyppul salýǵa qatysty qujattar tiisti organdarǵa jiberilgen. Ministrlik naqty tulǵalardyń kinási men jaýapkershiligin anyqtaý ýákiletti organdardyń quzyrynda ekenin atap ótti.
Vedomstvo mektepke turaqty direktordyń áli taǵaiyndalmaý sebebin de túsindirdi. Ministrliktiń málimetinshe, bul 2026 jylǵy 1 shildede kúshine engen "Qazaqstan Respýblikasynyń memlekettik qyzmeti týraly" jańa zań talaptaryna bailanysty.
"Qazirgi ýaqytta tiisti qaǵidalar bekitilý rásiminen ótýde. Olar kúshine engenge deiin Ministrliktiń konkýrs ótkizýge nemese turaqty direktordy tikelei taǵaiyndaýǵa quqyqtyq negizi joq. Konkýrstan tys taǵaiyndaý zań talaptaryn buzady", - dep málimdedi vedomstvo.
Qaǵidalar kúshine engennen keiin mektep direktorynyń bos laýazymyna ashyq konkýrs jariialanbaq.
Qazir Oqý-aǵartý vitse-ministri Jaiyq Sharabasov, Qarjy jáne memlekettik satyp alý departamenti direktorynyń orynbasary Elnar Sabyr jáne Y. Altynsarin atyndaǵy Ulttyq bilim akademiiasynyń vitse-prezidenti Gúlshat Muhtarhanova mektepte jumys júrgizip jatyr. Ministrlik ókilderi bilim ordasyndaǵy oqý protsesiniń uiymdastyrylýyn baqylaýǵa alǵan.
"Ata-analardy, pedagogterdi, oqýshylardy jáne mektep túlekterin resmi aqparatqa súienýge, tekserilmegen málimetterdi taratpaýǵa jáne asyǵys qorytyndy jasamaýǵa shaqyramyz. Júrgizilip jatqan jumystyń qorytyndysy boiynsha qosymsha aqparat beriledi", - delingen habarlamada.
