Алматы тұрғыны FlyArystan әуе компаниясына қарсы сотқа жүгінгенін мәлімдеді. Оның айтуынша, іс бойынша алғашқы сот отырысы 20 қазанда өтеді, деп хабарлайды dalanews.kz.
Жолаушының сөзінше, ол сотта дәлел ретінде өзінің смартфоны мен оқиға кезінде түсірілген бейнежазбаларды ұсынбақ.
Оның айтуынша, шілде айында Шымкент – Алматы бағытындағы рейс кезінде жолаушылар ұшақ бортына отырғызылғаннан кейін шамамен 45 минут бойы жабық есік жағдайында отырған. Автордың мәлімдеуінше, сол уақытта әуе кемесінде кондиционер жұмыс істемеген.
«Бізді Шымкент әуежайында кешкі сағат 17:00 шамасында ұшақ ішінде есіктері жабық күйде, кондиционерсіз 45 минут ұстады», – деп жазды ол әлеуметтік желідегі парақшасында.
Жолаушының айтуынша, әуе тасымалдаушы компания соттағы ұстанымында бұл жағдайды елеулі құқық бұзушылық ретінде мойындамай отыр.
Әзірге FlyArystan компаниясы аталған жағдайға қатысты ресми түсініктеме берген жоқ. Іс бойынша сот отырысы 20 қазанға белгіленген.
