Ақтөбе облысы Қандыағаш қаласының әкімі Қазбек Аққайырға қатысты сотта даулы іс қаралды, деп хабарлайды Dalanews.kz.
Тергеу материалдарына сәйкес, өткен жылдың соңында 39 жастағы әкім жергілікті балабақшаның тәрбиешісін ұрып-соғып, басына және бетіне бірнеше соққы жасаған. Сондай-ақ, оқиға кезінде балағат сөздер айтқаны да көрсетілген. Дәрігерлер жәбірленушіге «ми шайқалуы» деген диагноз қойған.
Зардап шеккен тәрбиеші өзінің әкіммен жақын қарым-қатынаста болғанын айтқан. Алайда Қазбек Аққайыр бұл айыптаулардың барлығын жоққа шығарып отыр.
Бұл әкімнің аты бірінші рет дау-дамайға іліккен жоқ. Биылдың өзінде Әдеп жөніндегі кеңес оған екі рет тәртіптік жаза қолданған. Сондай-ақ, тұрғындармен дөрекі сөйлегені үшін де бірнеше шағым түскен.
Айта кетейік, Қазбек Аққайыр 2020 жылы республикалық «Үздік ауыл әкімі» байқауында жеңімпаз атанған болатын.
