Стратегиялық маңызды шикізатты елден жасырын әкетпек болғандар ұсталды,- деп хабарлайды Dalanews.kz.
Бұл туралы ҚР ІІМ ұйымдасқан қылмысқа қарсы күрес департаментінің өкілі Қуандық Алпыс мәлімдеді.
"Жетісу облысында Полиция департаментінің жедел қызметкерлері стратегиялық маңызы бар шикізат саналатын қорғасынның ірі партиясын заңсыз әкетуге жол бермеді. 60 тоннадан аса қорғасын тиелген екі жүк көлігі тоқтатылды, оның нарықтағы құны 60 миллион теңгеден асады. Жүк заңсыз экспортқа жіберілмек болған", - деді ол.
Қылмыстық схеманы ұйымдастырғандар анықталып, оларды ұстау бойынша жедел іс-шаралар жүргізіліп жатыр.
Бұған дейін осындай жағдайлар еліміздің басқа өңірлерінде де анықталған болатын. Кінәлілер заңға сәйкес жауапкершілікке тартылған.
