– Биыл 52 675,1 млн теңгеге 17 жоба жоспарланған болатын. Жыл басынан бері 32 910,1 млн теңгеге 10 жоба іске асырылды, – деді Р.Сағандықов.
Осы күнге дейін облыста дәнді және дәнді-бұршақты дақылдардың 86%-ы жиналып, 334,05 мың тонна астық қамбаға бастырылған. Майлы дақылдарды жинау жұмыстары басталып, бүгінгі таңда 54,74 мың гектардан, 116,03 мың тонна өнім жиналды.
– Егін жинау жұмыстарын жүргізуге облыс шаруаларына 8,5 мың тонна жеңілдетілген дизель отыны бөлінді. Бүгінгі таңда бұл көлем толығымен игерілген. Жуырда ҚР ЭМ мен ҚР АШМ-ге егін жинау жұмыстарына тағы 10 мың тонна көлемінде жеңілдетілген дизель отынына қажеттілік жөнінде хат жолданды. Дәнді және майлы дақылдарды кептіру үшін облыс үшін 7 мың тонна дизель отыны бөлінді, – деп атап өтті спикер.
Бүгінде облыста 18,8 мың басқа арналаған 34 бордақылау алаңы жұмыс істейді, оның ішінде өнеркәсіптік үлгідегі 8 алаң 1000 бастан, қалған 26 алаң қуаттылығы 90-нан 600 басқа дейін мал бордақылайды.
Ағымдағы жылдың 8 айының қорытындысы бойынша жүктеме 24% құрап отыр.
– Өңірде 37 сүт-тауар фермасы және 23 сүт қабылдау пункті жұмыс істейді. Жыл басынан бері сүт-тауар фермаларында 51 мың тонна сүт өндірген. Тұрғындардан 11,8 мың тонна сүт сатып алынды. Сүт өңдеу кәсіпорындарының жүктемесі 42% құрады, – деп толықтырды Рамиль Сағандықов.
Баспасөз мәслихатының соңында ШҚО АШ басқармасы басшысының м.а. инфляцияны болдырмау және әлеуметтік маңызы бар азық-түлік тауарларының бағасын тұрақтандыру мақсатында 2023-2024 жылдары "айналым схемасы" тетігі шеңберінде облыс бюджетінен 4,2 млрд теңге бөлінгенін жеткізді.
