Еуропадағы аптап ыстық кондиционерлерге сұранысты күрт арттырып, қытайлық өндірушілердің экспортын еселеп өсірді, деп хабарлайды dalanews.kz.
Қытайдың Еуропалық одаққа кондиционер экспорты 2026 жылдың алғашқы жартысында өткен жылдың сәйкес кезеңімен салыстырғанда 43%-ға өсіп, 3,8 млрд долларға жетті.
Сұраныстың өсуіне биыл Еуропаның бірқатар елдерінде тіркелген рекордтық ыстық себеп болды. Еуропада кондиционерлердің таралу деңгейі Азиямен салыстырғанда төмен. Сондықтан аптап кезінде тұрғындар салқындату құрылғыларын жаппай сатып ала бастаған.
Қытайлық компаниялар бұл сұранысқа тез бейімделіп, орнатуды қажет етпейтін портативті кондиционерлерді белсенді түрде ұсынуда. Мұндай құрылғыларды қабырғаны бұрғыламай орнатуға болады. Бұл әсіресе кондиционер орнату күрделі әрі қымбат болатын еуропалық ескі үйлер үшін тиімді шешімге айналды.
Қытайлық өндірушілердің ішінде Midea, Haier, Gree және TCL сияқты компаниялардың сатылымы айтарлықтай өскен. Мәселен, TCL компаниясының Еуропадан алған тапсырыстары жылдың алғашқы жартысында 67%-дан астам артқан. Портативті кондиционерлердің сатылымы 90%-дан жоғары өскен. Haier компаниясының Франция, Германия және Ұлыбританиядағы сатылымы маусым айында екі есеге артса, Midea-ның Еуропаның төрт ірі нарығындағы кондиционер сатылымы алғашқы жартыжылдықта 70%-дан астам өскен.
Қытайдан Батыс Еуропаға портативті кондиционерлер экспорты жылдың алғашқы бес айында 70%-ға өскен. Reuters агенттігінің мәліметінше, Midea компаниясының PortaSplit портативті кондиционеріне сұраныс соншалық жоғары болғандықтан, кей нарықтарда оның қайта сатылымдағы бағасы жаңа құрылғының бағасынан асып кеткен.
Қытайлық өндірушілердің нарықтағы позициясы да күшейіп келеді. Euromonitor International деректеріне сүйенген Bloomberg мәліметі бойынша, қытайлық компаниялар әлемдік кондиционер нарығының шамамен үштен екісін бақылайды.
Алайда өндірушілердің алдында бірқатар тәуекел бар. Еуропалық энергетикалық тиімділік талаптары, электр желілеріне түсетін жүктеме, климаттық реттеу және сауда шектеулері қытайлық компаниялардың одан әрі кеңеюін қиындатуы мүмкін.
Соған қарамастан, биылғы аптап ыстық қытайлық кондиционер өндірушілері үшін Еуропадағы жаңа нарық мүмкіндігіне айналды. Сұраныстың өсуі компанияларды өндірісті арттыруға және жеткізу мерзімдерін қысқартуға итермелеп отыр.
