Eýropadaǵy aptap ystyq konditsionerlerge suranysty kúrt arttyryp, qytailyq óndirýshilerdiń eksportyn eselep ósirdi, dep habarlaidy dalanews.kz.
Qytaidyń Eýropalyq odaqqa konditsioner eksporty 2026 jyldyń alǵashqy jartysynda ótken jyldyń sáikes kezeńimen salystyrǵanda 43%-ǵa ósip, 3,8 mlrd dollarǵa jetti.
Suranystyń ósýine biyl Eýropanyń birqatar elderinde tirkelgen rekordtyq ystyq sebep boldy. Eýropada konditsionerlerdiń taralý deńgeii Aziiamen salystyrǵanda tómen. Sondyqtan aptap kezinde turǵyndar salqyndatý qurylǵylaryn jappai satyp ala bastaǵan.
Qytailyq kompaniialar bul suranysqa tez beiimdelip, ornatýdy qajet etpeitin portativti konditsionerlerdi belsendi túrde usynýda. Mundai qurylǵylardy qabyrǵany burǵylamai ornatýǵa bolady. Bul ásirese konditsioner ornatý kúrdeli ári qymbat bolatyn eýropalyq eski úiler úshin tiimdi sheshimge ainaldy.
Qytailyq óndirýshilerdiń ishinde Midea, Haier, Gree jáne TCL siiaqty kompaniialardyń satylymy aitarlyqtai ósken. Máselen, TCL kompaniiasynyń Eýropadan alǵan tapsyrystary jyldyń alǵashqy jartysynda 67%-dan astam artqan. Portativti konditsionerlerdiń satylymy 90%-dan joǵary ósken. Haier kompaniiasynyń Frantsiia, Germaniia jáne Ulybritaniiadaǵy satylymy maýsym aiynda eki esege artsa, Midea-nyń Eýropanyń tórt iri naryǵyndaǵy konditsioner satylymy alǵashqy jartyjyldyqta 70%-dan astam ósken.
Qytaidan Batys Eýropaǵa portativti konditsionerler eksporty jyldyń alǵashqy bes aiynda 70%-ǵa ósken. Reuters agenttiginiń málimetinshe, Midea kompaniiasynyń PortaSplit portativti konditsionerine suranys sonshalyq joǵary bolǵandyqtan, kei naryqtarda onyń qaita satylymdaǵy baǵasy jańa qurylǵynyń baǵasynan asyp ketken.
Qytailyq óndirýshilerdiń naryqtaǵy pozitsiiasy da kúsheiip keledi. Euromonitor International derekterine súiengen Bloomberg málimeti boiynsha, qytailyq kompaniialar álemdik konditsioner naryǵynyń shamamen úshten ekisin baqylaidy.
Alaida óndirýshilerdiń aldynda birqatar táýekel bar. Eýropalyq energetikalyq tiimdilik talaptary, elektr jelilerine túsetin júkteme, klimattyq retteý jáne saýda shekteýleri qytailyq kompaniialardyń odan ári keńeiýin qiyndatýy múmkin.
Soǵan qaramastan, biylǵy aptap ystyq qytailyq konditsioner óndirýshileri úshin Eýropadaǵy jańa naryq múmkindigine ainaldy. Suranystyń ósýi kompaniialardy óndiristi arttyrýǵa jáne jetkizý merzimderin qysqartýǵa itermelep otyr.
