Танымал қазақстандық актер қызды ұрды деп айыпталды. Актер Шәріп Серік осы айыптаудан кейін мәлімдеме жасады, – деп хабарлайды Dalanews.kz.

Ол қыздың өзінен де, дүйім жұрттан да кешірім сұрады.

"Мен зорлық-зомбылыққа қарсымын. Өкінішке қарай, менің Әлияны лифтіден жұлқып шығарған видеомды көрдіңіздер. Бұл видео арқылы өзімді ақтағым келмейді. Ауыр әрекет жасадым. Заң алдында толық жауап беруге дайынмын.

Сіздерден менің қатемді қайталамауды және қол көтермеуді сұраймын. Мен Әлияны шапалақпен ұрдым, сол үшін одан, оның отбасынан және менің әрекетім ауыр тиген барлық адамнан кешірім сұраймын", - деді актер.

Айта кетейік, бұған Әлия Бутеева есімді қыз желіде сурет-видеолар жариялады. Кадрлардан актер Шәріп Серік қыздың артынан жалаң аяқ жүгіріп шығып, қолынан ұстап, лифттен шығарып алғаны көрінеді.

Қыз беті қызарған суреттерін де жариялады.

Қазір осы оқиға бойынша тексеріс жүргізіліп жатыр.

"Бұл дерек бойынша тексеріс жүргізіліп жатыр. Оқиғаның мән-жайы, соның ішінде орны мен уақыты анықталып, Қазақстан Республикасының заңнамасына сәйкес шаралар қолданылады", - деді Алматы Полиция департаменті өкілі.

Осы оқиғадан кейін Sәlem Entertainment компаниясы актер Шәріп Серікпен әріптестік қарым-қатынасын тоқтату туралы шешім қабылдады.