"Құқықтық медиа орталық" қоғамдық ұйымының директоры Диана Окремова еліміздегі мемлекеттік қаражаттың қайда және қалай жұмсалып жатқанын сөз етті, деп хабарлайды Dalanews.kz.

Окремованың айтуынша, қазақстандық салық төлеушілердің қаржысы ресейліктердің мүддесіне жұмсалып жатыр.

"Өткен жылы Қазақстанның Есеп комитеті Мәдениет және ақпарат министрлігі мен оның қарамағындағы мекемелердің мемлекеттік қаражатты пайдалануына қатысты есеп жүргізген болатын. Зерттеу нәтижесінде 4 миллиард теңге ресейлік саяси мазмұнды Қазақстанда көрсетуге жұмсалғаны, ал 2,5 миллиард теңге қазақ телеарналарын Ресейде таратуға бағытталғаны анықталды. Бұл қаражаттың мақсатсыз жұмсалғаны туралы Есеп комитетінің қорытындысы да бар," - деп мәлімдеді Окремова.

Оның айтуынша, мұндай шығындар Қазақстанның ақпараттық қауіпсіздігіне қатер төндіріп, мемлекеттік қаржының тиімсіз жұмсалуына себеп болуы мүмкін.

"Қазақстан аумағында ресейлік телеарналардың таралуы халықтың көзқарасына, қоғамдық пікірге әсер етуі ықтимал. Әсіресе, саяси және халықаралық мәселелерде біржақты ақпарат беру арқылы халықтың ойлау жүйесіне теріс ықпал ету қаупі бар. Бұл жағдай ұлттық мүддеге қарсы әрекеттерге итермелеуі де ғажап емес. Мысалы, шетелдегі қақтығыстарды тек бір қырынан көрсету халықтың санасын улауы мүмкін," - деп ескертті Окремова.

Оның айтуынша, мұндай шығындар қазақстандықтардың мүдделеріне сай келмейді. Сондықтан бұл қаржының қалай және не мақсатта жұмсалғанын нақты тексеру және оның есебін талап ету орынды болмақ.

Осылайша, Қазақстандағы ақпараттық кеңістікті сыртқы ықпалдан қорғау қажеттілігі және мемлекеттік қаражаттың мақсатты әрі тиімді пайдаланылуы басты назарда болуы тиіс.