Қазақстанда көмір бағасының өсуі жалғасып жатыр. Биылғы қаңтар–тамыз айларының қорытындысы бойынша қатты отынның құны өткен жылдың сәйкес кезеңімен салыстырғанда 7,9%-ға артқан, деп хабарлайды dalanews.kz.
Energyprom.kz сарапшыларының мәліметінше, көмір бағасының қазіргі өсімі соңғы жылдардағы қалыптасқан үрдістен аса ерекшеленбейді. Мәселен, өткен жылдың алғашқы сегіз айында көмір бағасы 8,3%-ға қымбаттаған болатын.
Жалпы, Қазақстанда көмір құнының тұрақты өсуі 2022 жылдан бері байқалып келеді. Кейбір кезеңдерде бағаның өсу қарқыны қазіргі көрсеткіштен де жоғары болған.
Өңірлердегі жағдай әркелкі
2025 жылдың қорытындысы бойынша елдегі 20 өңірдің 12-сінде көмір бағасының өсімі республикалық орташа деңгейден асып түскен. Сол жылы Қазақстан бойынша көмір бағасы орта есеппен 8,5%-ға көтерілген.
Көмір ең көп қымбаттаған аймақтар
Бағаның ең жоғары өсімі Ақтөбе облысында тіркеліп, көмір құны бір жылда 23,2%-ға артқан. Одан кейін Абай облысы (14,4%) мен Жамбыл облысы (13,4%) тұр. Сонымен қатар екі өңір бойынша көмір бағасына қатысты статистикалық мәліметтер жарияланбаған.
