Ұлыбритания премьер-министрі Кир Стармер мен Канада үкіметінің басшысы Марк Карни Палестинаны мойындағанын дерлік бір уақытта жариялады, деп хабарлайды Dalanews.kz Bild-ке сілтеп.
Екі саясаткер де бұл қадам «екі мемлекет» шешімін жүзеге асыруға жақындатады деп есептейді. Бұл Израильмен қатар бейбіт өмір сүретін тәуелсіз палестиналық мемлекетті құруды білдіреді.
Израиль премьер-министрі Биньямин Нетаньяху бұл бастаманы түбегейлі жоққа шығарып, палестиналық мемлекеттің құрылуы Израильдің өмір сүруіне қауіп төндіретінін және 2023 жылдың 7 қазанындағы оқиғалар үшін ХАМАС террористеріне «сыйақы» болатынын айтты.
Марк Карнидің сөзінше, Канада Палестинаны мойындап, екі ел үшін бейбіт болашақты жүзеге асыру жолында серіктестік ұсынбақ. Ресми мойындау келесі аптада Нью-Йоркте өтетін БҰҰ Бас Ассамблеясының сессиясында жүзеге асады деп күтілуде.
Канада мен Ұлыбританиядан кейін Франция, Бельгия және Жаңа Зеландия да осындай шешім қабылдауды жоспарлап отыр. Алайда АҚШ пен Германия әзірге палестиналық мемлекетті мойындаудан бас тартып отыр. Германияның сыртқы істер министрі Йоханн Вадефуль қазіргі сәтте мойындау мүмкін емес екенін, бірақ «екі мемлекет» шешімі ықтимал болып қалуы тиіс екенін атап өтті.
