Баласын көтеріп, курьер болып жүрген ана Алматыдан Шымкентке қайта көшіп кеткен. Бұл туралы еңбек және халықты әлеуметтік қорғау вице-министрі Ербол Тұяқбаев мәлімдеді, деп хабарлайды dalanews.kz.
Вице-министрдің айтуынша, отбасының мұндай шешім қабылдауына нақты не себеп болғаны белгісіз.
"Себебін білмейміз, отбасылық келісімдер болуы мүмкін. Бәлкім, ата-анасы қайта шақырған шығар, ол жағын нақтыламадық. Бірақ білетінім, кеше ғана Алматы мен Шымкент әкімдіктерінен сұрадым, олар бұл ақпаратты растады", – деді Ербол Тұяқбаев тілшілерге.
Сондай-ақ ол жас отбасының Шымкентке көшуіне министрлік немесе мемлекеттік органдар тарапынан ешқандай ықпал болмағанын атап өтті.
"Мемлекет ұйымдары тарапынан еш қысым болған жоқ", – деді вице-министр.
Айта кетейік, бұған дейін әлеуметтік желіде сәбиін көтеріп, курьер болып жұмыс істеп жүрген ананың видеосы кең таралып, қоғамда қызу талқыланған еді.
