Алматыда 14 наурызда сағат 15:30-дан 15 наурыз сағат 5:00-ке дейін қалыңдығы 15 сантиметр қар жауды. Салдарынан бір тәулікте бірнеше жол апаты тіркелген, - деп хабарлайды Dalanews.kz.
Ауа райы нашарлауына байланысты алматылық тәртіп сақшылары жол қозғалысына қатысушыларды қауіпсіздік шараларын күшейтуге шақырды.
"Кейінгі тәулікте қалада барлығы 22 жол-көлік оқиғасы тіркелді. Қаза тапқандар жоқ.
Толассыз жауған қар қаладағы жол жағдайын айтарлықтай қиындатқаны анық: кептеліс пайда болып, көліктердің жолда жүруі қиындады. Бірақ тәжірибе көрсеткендей, көбіне бұл құбылыстар жол қозғалысына қатысушылардың нашар тәртібінен туындайды: кейбір жүргізушілер жылдамдықты төмендетпейді, жол апатын, қауіпті маневрлер жасайды, бір-біріне құрмет көрсетпейді, жаяу жүргіншілер дұрыс емес жерден жолдан өтеді. Осы факторлар жалпы жол жағдайына кері әсер етеді", – деді Алматы қалалық ПД жергілікті полиция қызметі басқармасының бастығы Серік Шумаев.
"Қазгидромет" РМК болжамынша, бүгін күндіз ауа температурасы 0-… +2 градус аралығында болады, жауын-шашын жаумайды.
