Алматы әкімдігі халық көп жиналатын орындарға бейнебақылау жүйесін орнату үшін 2,4 миллиард теңге бөлуді жоспарлап отыр. Осы мақсатта камералардан алынған деректерді нақты уақыт режимінде жеткізетін мердігер іздестірілуде, деп хабарлайды Dalanews.kz ZTB-ға сілтеп.
Мемлекеттік сатып алу порталындағы мәліметке сәйкес, жүйе жолдарды, саябақтарды, аулаларды, мектептерді, мешіттер мен шіркеулерді, ауруханалар мен сауда орталықтарын қамтиды. 3050 камерадан алынған ақпарат "Дата-орталыққа" жіберіледі. Билік бұл шараны қауіпсіздік пен қоғамдық тәртіпті нығайту үшін қажет деп түсіндірді.
Келісімшарт аясында мердігер тек ақпаратты жеткізіп қана қоймай, жүйенің үздіксіз жұмыс істеуін 24/7 қамтамасыз етуі, техникалық қызмет көрсетіп, камераларды тазалау, қосалқы бөлшектерді ауыстыру және ақауларды жою жұмыстарын жүргізуі қажет. Сонымен қатар, бейнекөрініс сапасын бақылау, деректерді рұқсатсыз қол жеткізуден қорғау, жүйені бет-әлпетті және көлік нөмірлерін тану технологияларымен интеграциялау талап етіледі.
Жоба үш жылға есептелген: 2025 жылы – 714,7 млн теңге, 2026 және 2027 жылдары – 857,6 млн теңгеден бөлінеді. Тендерге өтінім қабылдау 2 сәуірге дейін ашық.
