Алаяқтық фактісі бойынша халықаралық іздеуде жүрген Ресей азаматы Алматы қаласында ұсталды, деп хабарлайды ҚР Ішкі істер министрлігінің ресми интернет-ресурсы.
«Алматы қалалық Полиция департаментінің экстремизмге қарсы іс-қимыл басқармасының қызметкерлері халықаралық іздеуде жүрген Ресей Федерациясының азаматын ұстады. Іздеу Ресей Федерациясының Краснодар өлкесі бойынша Федералдық қауіпсіздік қызметі басқармасының бастамасымен жарияланған», – делінген хабарламада.
Ұсталған азамат ұйымдасқан қылмыстық топ құрамында аса ірі көлемде алаяқтық жасады деген күдікке ілінген. Бар деректерге сүйенсек, мемлекетке келтірілген шығын көлемі 23 миллион рубльден асады.
– Жедел-іздестіру іс-шаралары барысында күдіктінің мүмкін орналасқан жері туралы ақпарат алынды. Алматы полиция бөлімшелерінің үйлесімді жұмысының нәтижесінде ол ұсталды. Қазіргі таңда уақытша ұстау изоляторына қамалды және оған қатысты экстрадициялау рәсімі басталды, – деді Алматы қаласы ПД экстремизмге қарсы іс-қимыл басқармасының басшысы Асхат Дәулетияров.
