Солтүстік Қазақстан облысы елдің аграрлық флагманы ретіндегі статусын нық сақтап, жаңа рекордтар орнатып келеді. Бұл туралы ОКҚ-дағы брифингте өңір әкімі Ғауез Нұрмұхамбетов мәлімдеді, деп хабарлайды Dalanews.kz

Агроөнеркәсіптік кешен облыс экономикасының төрттен бірін қамтамасыз етеді: АӨК-тің ЖӨӨ-дегі үлесі өткен жылғы 21%-дан 23,4%-ға жетті. Ауыл шаруашылығының жалпы өнім көлемі 878,3 млрд теңгеге өсіп, өңірдің аграрлық өндіріс бойынша Қазақстандағы тұрақты үштік қатарында қалуына мүмкіндік берді.

СҚО елдің азық-түлік қауіпсіздігін қамтамасыз етіп отыр: мұнда бүкіл қазақстандық астықтың шамамен ширегі (24,8%) және майлы дақылдардың 23,6%-ы өндіріледі, сондай-ақ сүттің оныншы бөлігі (10,2%) осы өңірге тиесілі. Биыл аграрийлер 6,5 млн тонна рекордтық астық жинап, гектар өнімділігін 21 центнерге жеткізді. Майлы дақылдар бойынша тарихи нәтиже – 1 млн гектар егіс көлемінен 1,2 млн тонна өнім алынды, бұл – ел бойынша ең жоғары көрсеткіш.

СҚО-ның көшбасшылығы табиғи потенциалмен ғана емес, саланы жаңғыртумен де бекемделген. Аграрлар 340 мың тонна минералды тыңайтқыш (жоспардың 102%) және 66 млрд теңгеге 2,3 мың дана заманауи ауылшаруашылық техникасын сатып алды. Биыл АӨК-ті жеңілдетілген қаржыландыру көлемі рекордтық 161 млрд теңгеге жетіп, саланың тұрақты өсуін қамтамасыз етті және Солтүстік Қазақстан облысының елдегі басты аграрлық күш ретіндегі беделін бекітті.