31 қаңтарда Жамбыл облысы Жуалы ауданы Күйік асуында ауа райы нашарлауына байланысты (боран, жол көрінбей) “Алматы-Ташкент” республикалық маңызы бар жолда (567 км) жаппай жол-көлік апаты болды, - деп хабарлайды Dalanews.kz.
Төтенше жағдайлар департаментінің баспасөз қызметі жазғандай,жол-көлік апатында жеңіл көліктер, жолаушылар автобустары мен жүк машинасы соқтығысқан. Апат салдарынан Б.Момышұлы аудандық ауруханасына түрлі жарақаттармен 19 адам жеткізілді, оның ішінде 1 бала бар.
Сондай-ақ, ТЖД күштері қысылған адамдарды шығару бойынша авариялық құтқару жұмыстарын жүргізіп жатыр. Қаза болғандар тіркелмеген.
Қазіргі уақытта Нұрлыкент ауылының "Мәдениет үйі" жылыту пунктіне 39 адам жеткізілді, оның ішінде 8 бала бар. Облыс аумағында ауа райы жағдайы нашарлауына байланысты департамент базасында жедел штабтың жұмысы ұйымдастырылған. Жедел штаб жұмысына азаматтық қорғау қызметтерінің өкілдері жұмылдырылған. Психологиялық қолдау үшін сенім телефонына байланысуға болады.
