ەلوردالىق ەرىكتىلەر تۇنگى ۋاقىتتا قار تازالاۋ جۇمىسىنا جۇمىلدىرىلعان كوممۋنالدىق قىزمەت ماماندارىنا ىستىق شاي مەن باۋىرساق تاراتتى، دەپ حابارلايدى قالا اكىمدىگىنىڭ رەسمي سايتى.

قاردىڭ مول جاۋۋىنا بايلانىستى ەلوردانىڭ كوممۋنالدىق قىزمەتكەرلەرى تاۋلىك بويى كۇشەيتىلگەن رەجيمدە جۇمىس ىستەپ جاتىر.

كۇندىزگى اۋىسىمعا 1700-دەن استام ارنايى تەحنيكا مەن 2500-گە جۋىق جول جۇمىسشى كوشەلەردى قاردان تازارتۋعا شىقتى. وتكەن تاۋلىكتە قالادان 37 مىڭ تەكشە مەتردەن استام قار شىعارىلدى، بۇل 2802 جۇك رەيسىن قۇرايدى.

تۇنگى اۋىسىمعا قار تازالاۋعا 1500-دەن استام ارنايى تەحنيكا مەن 400-گە جۋىق جول جۇمىسشى شىقتى.

بۇگىن قار تازالاۋمەن اينالىساتىنداردىڭ بارلىعىنا ەرىكتىلەر باۋىرساق پەن ىستىق شاي تاراتادى.

مۇنداي يگى ءىس قالانىڭ بارلىق اۋدانىندا جۇرگىزىلەدى.

«بەيتانىس ادامدارعا قامقورلىق كورسەتىپ جۇرگەن ەرىكتىلەرگە العىسىمىز شەكسىز. بۇل جۇرەككەجىلۋلىق سىيلايدى»، – دەيدى جول قىزمەتكەرلەرىنىڭ ءبىرى.

قىس مەزگىلىنىڭ باسىنان باستاپ ەلوردادا 1 508 140 تەكشە مەتر قار شىعارىلدى، بۇل 111 مىڭنان استام اۋىر جۇك رەيسىن قۇرايدى.

ەرىكتىلەر ىستىق شاي مەن باۋىرساقتاردى تاراتۋمەن قاتار، قار تازالاۋعا كومەك كورسەتەدى، حالىقتىڭ الەۋمەتتىك وسال توپتارىنان شىققان وتباسىلارعا ازىق-تۇلىك سەبەتتەرىن تاسىمالدايدى، قارت كىسىلەرگە وتىن كەسۋگە كومەكتەسەدى.

ەستەرىڭىزگە سالا كەتەيىك، ەلوردادا يگى ىستەر مارافونى ءوتىپ جاتىر. اكسيانىڭ باستى ماقساتى – ەرىكتىلەر مەن تۇرعىندارعا حالىقتىڭ الەۋمەتتىك ءالسىز ساناتتارىنا، قارت ادامدارعا، مۇقتاج زەينەتكەرلەرگە بارىنشا كومەك كورسەتۋ.