وقۋ-اعارتۋ ءمينيسترى جۇلدىز سۇلەيمەنوۆا پەداگوگتەردى اتتەستاتتاۋعا قاتىستى ماڭىزدى سۇراقتارعا جاۋاپ بەردى، دەپ حابارلايدى Dalanews.kz.
بۇعان دەيىن مينيستر مۇعالىمدەردىڭ پاندىك بىلىكتىلىگىن باعالاۋ تەستى توقتاتىلعانىن ايتقان ەدى. وسىدان كەيىن ۇستازدار اراسىندا داۋلى ساۋالدار تۋىنداعان.
"بىرىنشىدەن، بۇل ۋاقىتشا توقتاتۋ ەمەس. ەندى ۇستازدارىمىز پاندىك بىلىكتىلىك تەستىن تاپسىرمايدى. بۇل تەستتى الىپ تاستادىق"، - دەدى ول.
جۇلدىز سۇلەيمەنوۆانىڭ ايتۋىنشا، بۇل تەستتى تاپسىراتىن ءبىر سانات بار، بۇل ساناتقا وقۋ ورنىن جاڭا بىتىرگەن تۇلەكتەر جاتادى.
"بۇل تەستتى كىم تاپسىرادى؟ پەداگوگ ماماندىعىنا ەڭ العاش قادام باسىپ جاتقان ۋنيۆەرسيتەت تۇلەكتەرى تاپسىرادى. ويتكەنى ولار ماماندىققا ەندى عانا كەلە جاتىر. ولاردىڭ ءبىلىم دەڭگەيىن ءبىلۋىمىز قاجەت. وسى جاڭا ۇستازدار ەكى جىلدان كەيىن پەداگوگ مودەراتور بىلىكتىلىك دەڭگەيىنە قادام باسقان كەزدە پەداگوگ بىلىكتىلىك تەستىن تاپسىرادى. قالعان ساناتقا وزدەرى اتتەستاسياعا تاپسىراتىن بىردە ءبىر ۇستاز پەداگوگ بىلىكتىلىك تەستىن تاپسىرمايدى. پەداگوگ بىلىكتىلىك تەستىنىڭ اتتەستاسياعا ەشقانداي بايلانىسى بولمايدى"، - دەدى ول.
مۇعالىمدەردىڭ پورتفوليوسىنا قاتىستى دا وزگەرىستەر كۇتىپ تۇر.
"پورتفوليو جيناقتاۋ ەندى ەلەكترون فورماتتا بولادى. ۇستاز رەتىندە پورتفوليو، قاعاز جيناقتاپ، اركىمنەن قول جيناپ جۇرمەيسىز"، - دەدى شەنەۋنىك.
وقۋ-اعارتۋ ءمينيسترىنىڭ ايتۋىنشا، اۆتورلىق باعدارلاما بويىنشا دا وزگەرىس بار.
"اۆتورلىق باعدارلامالار دا توقتاتىلادى. ەندى اۆتورلىق باعدارلاما جازىپ، ۇسىنۋدىڭ قاجەتى جوق"، - دەدى جۇلدىز سۇلەيمەنوۆا.
