قازاقستاننىڭ ۇلتتىق قاۋىپسىزدىك كوميتەتىن 2001-2006 جىلدارى باسقارعان نارتاي دۇتبايەۆ كارىم ءماسىموۆ كورىپكەلدەرگە سەنگەنىن ايتتى، دەپ حابارلايدى Dalanews.kz. 

"ول ءبىلىمدى ازامات بولعانىنا قاراماستان كورىپكەلدەرگە سەنەتىن. ءتىپتى جۇمىس كۇنىن استرولوگپەن كەڭەسىپ، ءبىراق باستايتىن. بۇل راس اقپارات ەكەنىنە جاۋاپ بەرەمىن"، دەيدى دۇتبايەۆ Airan media-عا بەرگەن سۇحباتىندا.

ەسكە سالايىق، بۇعان دەيىن قازاقستاندىق كورىپكەل باقىت جۇماتوۆا ونىڭ كومەگىنە جوعارعى سوتتاعىلار دا، پروكۋراتۋراداعىلار دا جۇگىنەتىنىن ايتقان بولاتىن. 

«جوعارعى سوتتا، پروكۋراتۋرادا جۇمىس ىستەيتىن كليەنتتەرىم بار. كوپتەگەن جۋرناليستەر ماعان جۇگىنەدى. ايەلدەر عانا كورىپكەلگە جۇگىنەدى دەپ ايتا المايمىن. ەر ازاماتتار دا، جاس بالالار دا كەلەدى. ەر ادامدار ايەلى كوزىنە ءشوپ سالىپ ءجۇر مە دەگەن سۇراقپەن كەلەدى. ونداي ادامدار بۇرىن بولعان، ءقازىر دە بار، بولاشاقتا دا بولادى. بيشىمبايەۆتىڭ سوتىندا ءبارى كورىپكەل، تارولوگ دەگەن نارسە بارىن ءبىرىنشى رەت ەستىگەندەي بولدى»، - دەيدى باقىت جۇماتوۆا Airan مەدياعا بەرگەن سۇحباتىندا.

اق انا اتتى قاسكەلەڭدىك ەمدەۋشى كەزىندە بولات نازاربايەۆ تا كەلگەنىن ايتادى. 

«مەن نازاربايەۆتار اۋلەتىن  ەمدەگەن كەزىم بولدى. ءبىز وتىرعان عيماراتتى سالعان بولات نازاربايەۆ دەپ ايتادى. شىن مانىندە ول سالعان جوق. ءبىراق عيماراتتى سالۋعا ءوزىمنىڭ شاكىرتتەرىم، قاراپايىم ادامدار كومەكتەستى»، - دەيدى اق انا.

ەكونوميست، قوعام قايراتكەرى ايدار الىبايەۆتىڭ سوزىنشە، جوعارى شەندى مەملەكەتتىك قىزمەتكەرلەر اراسىندا كورىپكەلگە بارۋ – قالىپتى نارسە.

«ولار ارينە ونى مويىندامايدى، تىنىش بارىپ كەلەدى. ءبىراق كوبى كورىپكەلگە جۇگىنەدى. ءبىزدىڭ شەنەۋنىكتەر ۇنەمى وزىنە سەنىمسىز جۇرەدى. ءبىراق ول دا قالىپتى جاعداي. سەبەبى، ولاردى ءجيى اۋىستىرىپ تاستايدى. (...) مينيسترلەر، اكىمدەردىڭ ءبارى كورىپكەلگە جۇگىنەدى. ولاردى قورعاپ جۇرەتىن، كوز تيۋدەن قورعايتىن جەكە كورىپكەلدەرى بولادى. كەيبىر كورىپكەلدەر بولاشاعى جارقىن ەكەنىن ايتىپ، كوڭىل كۇيىن كوتەرەدى. ناقتى كەسىپ ايتا المايمىن، ءبىراق نازاربايەۆ تا كورىپكەلگە بارعان. جالپى كورىپكەلدىڭ كومەگىنە جۇگىنۋ نازاربايەۆتىڭ كەزىندە سانگە اينالعان دەگەن سوزدەر بار. ءبىراق ونسىز دا ونداي ادامدار بولار ەدى. ءبارىمىز بولاشاقتا نە بولاتىنىن بىلگىمىز كەلىپ وتىرادى عوي»، - دەيدى ايدار الىبايەۆ.

بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى سوت وتىرىسىندا شىمكەنتتىك كورىپكەل كۋالىك ەتكەن بولاتىن. 

پروكۋرور ايجان ايماعانوۆا كورىپكەل جەكە دەرەكتەرىن جاريا ەتكىسى كەلمەيتىنىن ايتىپ، سوت وتىرىسى بارىسىندا سۋديادان ونىڭ تەك داۋىسى ەستىلۋىنە جاعداي جاسالۋىن سۇرادى. كورىپكەل وزىنە قىسىم جاسالىپ جاتقانىن مالىمدەگەن.

سوت وتىرىسى بارىسىندا كورىپكەل بيشىمبايەۆتى 1،5-2 جىلدان بەرى اناسى ارقىلى بىلەتىنىن ايتتى.

"ەكى ايدا ءبىر رەت قوڭىراۋ شالىپ، جۇمىسى، كاسىبى تۋرالى سۇرايتىن. مەن تارولوگپىن، ول بىردەڭە بىلگىسى كەلسە، "قاراپ كورىڭىزشى" دەپ جۇگىنەتىن"، - دەدى ول.

سونىمەن قاتار، كورىپكەل مارقۇم سالتانات نۇكەنوۆا قايتىس بولعان كۇن تۋرالى بايانداپ بەردى.

"ول حابارلاستى. ناقتى ۋاقىتى ەسىمدە جوق. مەنىڭ قولىم بوس ەمەس ەدى. ءبىراق تۇتقانى كوتەردىم. ول "سالتانات ەكەۋمىز قاتتى ماس بولىپ، توبەلەستىك" دەدى. بۇل شامامەن تۇستەن كەيىنگى ۋاقىت ەدى. 15.00-16.00 ەدى. ونىڭ ىشىمدىك ىشكەنى بايقالىپ تۇردى. قاتتى ءمان بەرمەدىم. ول "قاراپ بەرىڭىزشى" دەدى. مەن "دارىگەرگە حابارلاس، جەدەل جاردەم شاقىر" دەدىم. ول "قايتا-قايتا قاراپ كورىڭىزشى" دەدى. وتە قىسقا اڭگىمە بولدى. 30 سەكۋندتاي. ..."كەشە قاتتى ءىشىپ، قاتتى توبەلەستىك" دەدى. "مەن نە ىستەيىن؟" دەدىم. داۋىسى كۇندەگىدەي ەمەس ەدى، ءار ءسوزىن تاڭداپ ايتتى. مەن "جەدەل جاردەمگە حابارلاس" دەدىم"، - دەيدى كۋاگەر.

كورىپكەلدىڭ سوزىنشە، بيشىمبايەۆ سالتاناتتىڭ ۇيىقتاپ جاتقانىن، قورىلداپ جاتقانىن ايتقان. سونداي-اق، قوزعالمايتىنىن، تۇرمايتىنىن، ەشتەڭە ىشىپ-جەمەگەنىن جەتكىزگەن.