استانا ماڭىنداعى ۇلتتىق پانتەونعا جەرلەنەتىن ادامداردىڭ ءتىزىمى وزگەرەدى. ءتيىستى وزگەرىستى مادەنيەت جانە اقپارات مينيسترلىگى دايىندادى. قۇجاتقا سۇيەنسەك، پرەزيدەنتتەردىڭ وتباسى مۇشەلەرى دە بۇل تىزىمنەن الىنىپ تاستالماق، - دەپ حابارلايدى Dalanews.kz.
قازاقستاننىڭ ۇلتتىق پانتەونى - استانا قالاسىنان وڭتۇستىككە قاراي 17 شاقىرىم جەردە، قابانباي باتىر اۋىلىنىڭ ماڭىندا ورنالاسقان ەليتالىق زيرات. پانتەون قابانباي باتىر كەسەنەسىنىڭ نەگىزىندە سالىنعان. مۇنداي شەشىم 2014 جىلى قابىلداندى، ال قۇرىلىس 2015 جىلى باستالدى. وسىلايشا نىسان 2020 جىلعى ماۋسىمدا پايدالانۋعا بەرىلدى.
ەندى جاڭا وزگەرىسكە ساي مىنا ادامدار عانا پانتەون اۋماعىندا جەرلەنەدى:
- قازاقستان پرەزيدەنتتەرى؛
- قازاقستان پرەمەر-مينيسترلەرى جانە ولاردىڭ ورىنباسارلارى؛
- پارلامەنت پالاتالارىنىڭ ءتوراعالارى جانە ولاردىڭ ورىنباسارلارى؛
- مەملەكەتتىك كەڭەسشىلەر، پرەزيدەنت اكىمشىلىگىنىڭ باسشىلارى؛
- كونستيتۋسيالىق سوتتىڭ، جوعارعى سوتتىڭ جانە ۇلتتىق بانكتىڭ ءتوراعالارى؛
- پرەزيدەنتكە تىكەلەي باعىناتىن جانە ەسەپ بەرەتىن مينيسترلەر، مەملەكەتتىك ورگانداردىڭ باسشىلارى، وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ اكىمدەرى؛
- "حالىق قاھارمانى"، "قازاقستاننىڭ ەڭبەك ەرى" اتاقتارىنا يە بولعان تۇلعالار؛
- "التىن قىران"، "وتان"، "ەڭبەك داڭقى" وردەندەرىمەن ناگرادتالعان ازاماتتار؛
- "كەڭەس وداعىنىڭ باتىرى"، "سوسياليستىك ەڭبەك ەرى" اتاعىنا يە بولعان ازاماتتار؛
- "قازاقستاننىڭ عارىشكەر-ۇشقىشى" قۇرمەتتى اتاعىنا يە بولعان ازاماتتار؛
- پرەزيدەنتتىڭ ەرەكشە شەشىمى بويىنشا باسقا دا ازاماتتار؛
- پانتەونعا جەرلەنەتىن ادامدارمەن ولاردىڭ جۇبايلارى جەرلەنۋى مۇمكىن.
دەمەك ەندى پانتەونعا جەرلەنەتىن ادامدار تىزىمنەن قازاقستان پرەزيدەنتتەرىنىڭ وتباسى مۇشەلەرى، مەملەكەتتىك حاتشىلار مەن كونستيتۋسيالىق كەڭەستىڭ ءتوراعالارى شىعارىلادى.
سونىمەن قاتار، "قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ" وردەنىمەن ماراپاتتالعان ازاماتتار تىزىمنەن شىعادى. ءتيىستى وزگەرىس "تۇڭعىش پرەزيدەنت - ەلباسى تۋرالى" قازاقستان رەسپۋبليكاسىنىڭ كونستيتۋسيالىق زاڭى كۇشى جويىلعانىنا بايلانىستى ەنگىزىلگەن.
بۇل قاۋلى جوباسى 4 ناۋرىزعا دەيىن جاريا تالقىلاۋدا بولادى.
