ۇكىمەت باسشىسى اسقار مامين سەمەيگە جاسالعان جۇمىس ساپارى بارىسىندا قالانىڭ 2020-2025 جىلعا ارنالعان الەۋمەتتىك ەكونوميكالىق دامۋ جوسپارىمەن جانە ابايدىڭ 175 جىلدىعىنا دايىندىق بارىسىمەن تانىستى.
جالپى قالانى دامىتۋعا 260،2 ملرد تەڭگە قاراستىرىلعان. كەشەندى جوسپار 56 ءىس-شارادان تۇرادى. ونىڭ ىشىندە رەسپۋبليكالىق بيۋدجەتتەن 98،5 ملرد، جەرگىلىكتى بيۋدجەتتەن 85،5 ملرد، جەكە ينۆەستيسيالاردان 76،1 ملرد تەڭگە قاراستىرىلعان.
"سەمەي قالاسىنىڭ تاۋەلسىز قازاقستاننىڭ دامۋ تاريحىندا الار ورنى ەرەكشە. ەلباسى سەمەي قالاسىنا ەرەكشە قامقورلىق كورسەتۋدە. بۇدان بۇرىن ەلباسىنىڭ تاپسىرماسى بويىنشا سەمەي قالاسىن الەۋمەتتىك-ەكونوميكالىق دامىتۋدىڭ 2013 – 2017 جىلدارعا ارنالعان كەشەندى جوسپارى قابىلداندى. سوڭعى جىلدارى حالىق سانىنىڭ ءوسۋىنىڭ وڭ ديناميكاسى بايقالادى"، - دەدى ا. مامين.
پرەمەر-مينيستر ۇكىمەتتىڭ قالانىڭ الەۋمەتتىك-ەكونوميكالىق دامۋىنا جانە حالىقتىڭ ءومىر ءسۇرۋ ساپاسىن ارتتىرۋعا ەرەكشە نازار اۋدارىلىپ وتىرعانىن ايتتى. پرەزيدەنتتىڭ تاپسىرماسى بويىنشا الداعى بەس جىلعا ارنالعان قالانى الەۋمەتتىك-ەكونوميكالىق دامىتۋدىڭ كەشەندى جوسپارى قابىلداعانىن دا اتاپ ءوتتى.
سونداي-اق، كەلەر جىلى ابايدىڭ 175 جىلدىق مەرەيتويىن وتكىزۋدەگى جۇمىستارعا دا نازار اۋداردى. پرەمەر رەسپۋبليكالىق جانە ايماقتىق دەڭگەيدە 500-دەن استام ءىس-شارالاردى قامتيتىن جوسپاردىڭ ورىندالۋىن ەرەكشە باقىلاۋعا الاتىنىن ايتتى.
اسەم جىلقىشيەۆا،
شىعىس قازاقستان وبلىسى
