Úkimet basshysy Asqar Mamın Semeıge jasalǵan jumys sapary barysynda qalanyń 2020-2025 jylǵa arnalǵan áleýmettik ekonomıkalyq damý josparymen jáne Abaıdyń 175 jyldyǵyna daıyndyq barysymen tanysty.
Jalpy qalany damytýǵa 260,2 mlrd teńge qarastyrylǵan. Keshendi jospar 56 is-sharadan turady. Onyń ishinde respýblıkalyq búdjetten 98,5 mlrd, jergilikti búdjetten 85,5 mlrd, jeke ınvestısıalardan 76,1 mlrd teńge qarastyrylǵan.
"Semeı qalasynyń Táýelsiz Qazaqstannyń damý tarıhynda alar orny erekshe. Elbasy Semeı qalasyna erekshe qamqorlyq kórsetýde. Budan buryn Elbasynyń tapsyrmasy boıynsha Semeı qalasyn áleýmettik-ekonomıkalyq damytýdyń 2013 – 2017 jyldarǵa arnalǵan keshendi jospary qabyldandy. Sońǵy jyldary halyq sanynyń ósýiniń oń dınamıkasy baıqalady", - dedi A. Mamın.
Premer-Mınıstr Úkimettiń qalanyń áleýmettik-ekonomıkalyq damýyna jáne halyqtyń ómir súrý sapasyn arttyrýǵa erekshe nazar aýdarylyp otyrǵanyn aıtty. Prezıdenttiń tapsyrmasy boıynsha aldaǵy bes jylǵa arnalǵan qalany áleýmettik-ekonomıkalyq damytýdyń keshendi jospary qabyldaǵanyn da atap ótti.
Sondaı-aq, keler jyly Abaıdyń 175 jyldyq mereıtoıyn ótkizýdegi jumystarǵa da nazar aýdardy. Premer respýblıkalyq jáne aımaqtyq deńgeıde 500-den astam is-sharalardy qamtıtyn jospardyń oryndalýyn erekshe baqylaýǵa alatynyn aıtty.
Ásem Jylqysheva,
Shyǵys Qazaqstan oblysy
