ۇكىمەت باسشىسى ولجاس بەكتەنوۆ ۋكرايناداعى قاقتىعىستىڭ شيەلەنىسۋىنە بايلانىستى مەملەكەت باسشىسىنىڭ تاپسىرمالارىن ورىنداۋ بويىنشا شۇعىل جيىن وتكىزدى، دەپ حابارلايدى Dalanews.kz.

پرەمەر-مينيستر ۋكراينا توڭىرەگىندەگى جاعدايعا بايلانىستى قورعانىس، ىشكى ىستەر، توتەنشە جاعدايلار، سىرتقى ىستەر، دەنساۋلىق ساقتاۋ، كولىك، ەنەرگەتيكا، ونەركاسىپ جانە قۇرىلىس، ۇلتتىق ەكونوميكا، قارجى مينيسترلىكتەرىنىڭ باسشىلىعىمەن مەملەكەت باسشىسىنىڭ نەگىزگى اسكەري جانە ازاماتتىق وبەكتىلەردىڭ قاۋىپسىزدىگىن قامتاماسىز ەتۋ جونىندە شۇعىل شارالار قابىلداۋ تۋرالى تاپسىرمالارىن ورىنداۋ جونىندە جەدەل كەڭەس وتكىزدى.

"پرەمەر-مينيستر قورعانىس ءمينيسترى رۋسلان جاقسىلىقوۆتىڭ ستراتەگيالىق جانە ينفراقۇرىلىمدىق وبەكتىلەردى قورعاۋدى قامتاماسىز ەتۋ بويىنشا جۇرگىزىلىپ جاتقان جۇمىستار تۋرالى مالىمەتتەرىن تىڭداپ، مەملەكەتتىك ورگانداردىڭ ءىس-قيمىلدارىن كۇشەيتۋگە باعىتتالعان ءبىرقاتار مىندەتتەر قويدى. تۇراقتىلىق پەن قوعامدىق ءتارتىپتى ساقتاۋ، كولىك قاتىناسىنىڭ قاۋىپسىزدىگى، دەنساۋلىق ساقتاۋ وبەكتىلەرىنىڭ قىزمەتى جانە باسقا دا ماسەلەلەرگە نازار اۋدارىلدى.

ۋاكىلەتتى قۇرىلىمداردىڭ باسشىلىعىنا پرەزيدەنتتىڭ قاۋىپسىزدىكتى قامتاماسىز ەتۋ جونىندەگى تاپسىرمالارىنىڭ ورىندالۋىن ەرەكشە باقىلاۋدا ۇستاۋ جانە جاعدايدىڭ وزگەرۋى تۋرالى شۇعىل رەجيمدە بايانداۋ تاپسىرىلدى"، - دەلىنگەن ۇكىمەت حابارلاماسىندا.

ايتا كەتەيىك، مەملەكەت باسشىسى قاسىم-جومارت توقايەۆ ۇكىمەت باسشىسىنا، پرەزيدەنت اكىمشىلىگىنىڭ باسشىسىنا جانە كۇشتىك قۇرىلىمداردىڭ جەتەكشىلەرى مەن بارلىق اكىمگە ۋكراينا توڭىرەگىندەگى جاعدايدىڭ ۋشىعۋىنا بايلانىستى نەگىزگى اسكەري جانە ازاماتتىق نىسانداردىڭ قاۋىپسىزدىگىن قامتاماسىز ەتۋ جونىندە شۇعىل شارالار قابىلداۋدى تاپسىرعان ەدى.

بۇل تۋرالى پرەزيدەنت كەڭەسشىسى-باسپاسوز حاتشىسى بەرىك ءۋالي facebook-پاراقشاسىندا جازدى.

“پارلامەنت پالاتالارىنىڭ ءتوراعالارى قابىلدانىپ جاتقان ءىس-قيمىل تۋرالى حاباردار ەتىلدى.

پرەزيدەنت ەلىمىزدەگى جاعدايدى ءوز باقىلاۋىندا ۇستاپ وتىر.

ءبىزدىڭ ەلىمىز ءۇشىن باستى ستراتەگيالىق ماقسات – تۇراقتىلىقتى، تىنىشتىقتى، زاڭ مەن ءتارتىپ ۇستەمدىگىن ساقتاۋ.

قازاقستان سلاۆيان ەكى حالىق اراسىنداعى قاقتىعىستى كەلىسسوز ارقىلى توقتاتۋ قاجەت ەكەنىن بىرنەشە رەت مالىمدەگەن بولاتىن”، – دەپ جازدى ول.

ەسكە سالايىق، كۇنى كەشە رەسەي پرەزيدەنتى ۆلاديمير پۋتين ۋكرايناداعى قاقتىعىستىڭ عالامدىق سيپاتقا يە بولعانىن مالىمدەگەن ەدى.

وسىلايشا رەسەي پرەزيدەنتى ۋكراينامەن قازىرگى قارىم-قاتىناستىڭ جاعدايىن سيپاتتادى. بۇعان دەيىن ول ۋكراينا 19 جانە 21 قاراشادا كۋرسك جانە بريانسك وبلىستارىنداعى نىساندارعا باتىستىق زىمىراندارمەن سوققى جاساعانىن راستاعان ەدى.

ونىڭ ايتۋىنشا، رەسەي كۇشتەرى بۇعان جاۋاپ رەتىندە سوققى بەرگەن، ونىڭ ىشىندە تاجىريبەلىك قارۋ قولدانىلعان. رف “ورەشنيك” يادرولىق ەمەس گيپەردىبىستىق بالليستيكالىق زىمىرانمەن وڭتۇستىك ماشينا جاساۋ زاۋىتىنا جانە ۋكراينانىڭ قورعانىس-ونەركاسىپتىك كەشەنىنىڭ نىسانىنا بىرىكتىرىلگەن سوققى جاساعان.

پۋتين رەسەي ەسكالاسياعا جاۋاپ بەرەتىنىن جانە ءوزىنىڭ نىساندارىنا شەتەلدىك قارۋدى قولدانۋعا رۇقسات بەرگەن ەلدەردىڭ نىساندارىنا قارۋ قولدانۋعا قۇقىعى بار دەپ ەسەپتەيتىنىن اتاپ ءوتتى.

سونىمەن قاتار، ول رەسەي “ورەشنيك” سياقتى جۇيەلەرمەن سوققى جاسايتىن كەزدە ۋكراينانىڭ بەيبىت تۇرعىندارىنا ءقاۋىپتى ايماقتى الدىن الا تاستاپ شىعۋدى ۇسىناتىنىن ايتتى.

قورىتا ايتقاندا پۋتين مالىمدەمەسىندە: 

• "ۋكراينا باتىستىڭ الىستى كوزدەيتىن زىمىراندارىمەن رەسەيگە سوققى جاسادى"
• "كۋرسكى جانە بريانسكى وبلىستارىنا قاراتا امەريكالىق ATACMS-تار اتىلدى. ءبىراق ولار كوزدەگەن ماقساتتارىنا جەتپەدى. ءبىزدىڭ ءاشققج قاعىپ ءتۇسىردى"
• "ونان سوڭ ۇلىبريتانيانىڭ الىستى كوزدەيتىن Storm Shadow زىمىراندارى اتىلدى. ولار دا ناتيجەسىز بولدى"
• "ماماندار بىلەدى. بۇل زىمىرانداردى باتىستىڭ، ءوندىرۋشى ەلدىڭ كومەگىنسىز اتۋ مۇمكىن ەمەس"
• "ءبىز ەسكەرتتىك. العاش رەت زاماناۋي ءھام تەڭدەسسىز كونتينەنتارالىق “ورەشنيك” باليستيكالىق زىمىرانىمەن ۋكراينانىڭ دنەپرىنە سوققى جاسادىق. بۇل ءبىزدىڭ جاۋابىمىز!"
• "ءبىز وسى جانە وسىنداي جاڭا ءارى زاماناۋي زىمىرانداردى قولداناردا حالىققا الدىن الا ەسكەرتەمىز!"
• "بۇل جولى ءبىز يادرولىق وقتۇمسىقتار قولدانبادىق"