قازاقستاندىق مما فايتەرٸ بەكزات الماحان مانسابىن گرۋزييانىڭ RKENA پروموۋشەنٸندە جالعاستىرادى. سپورتشىنىڭ جاڭا ليگامەن كەلٸسٸمشارتقا وتىرعانىن پروموۋشەننٸڭ باسپاسٶز قىزمەتٸ مەلٸمدەدٸ, دەپ حابارلايدى Sportinside.kz.
RKENA ۇيىمى قازاقستاندىق فايتەردٸ رەسمي تٷردە تانىستىرىپ, ونى ليگانىڭ جاڭا مٷشەسٸ رەتٸندە قارسى الدى.
«قازاقستاننىڭ ٷزدٸك فايتەرلەرٸنٸڭ بٸرٸ بەكزات الماحاندى RKENA وتباسىنا قارسى الايىق!» – دەلٸنگەن پروموۋشەننٸڭ Instagram پاراقشاسىندا.
بەكزات الماحان 13 تامىزدا كەلٸسٸمشارتى اياقتالعاننان كەيٸن UFC روستەرٸنەن شىعارىلعان بولاتىن.
قازاقستاندىق سپورتشىنىڭ UFC-دەگٸ دەبيۋتٸ 2024 جىلدىڭ ناۋرىزىندا ٶتتٸ. ول قىسقا مەرزٸمدە ۇسىنىس قابىلداپ, سول سەتتە جەڭٸلٸس كٶرمەگەن رەسەيلٸك ۋمار نۋرماگومەدوۆپەن جەكپە-جەككە شىقتى. الماحان بٸرٸنشٸ راۋندتا قارسىلاسىن نوكداۋنعا تٷسٸرگەنٸمەن, ٷش راۋند قورىتىندىسىندا تٶرەشٸلەردٸڭ بٸراۋىزدان شىعارعان شەشٸمٸمەن جەڭٸلٸسكە ۇشىرادى.
ال UFC-دەگٸ العاشقى ەرٸ جالعىز جەڭٸسٸن بەكزات 2025 جىلدىڭ مامىرىندا تٸركەدٸ. ول كانادالىق برەد كاتونانى بٸرٸنشٸ راۋندتا نوكاۋتپەن جەڭدٸ.
ودان كەيٸن قازاقستاندىق فايتەر 2025 جىلدىڭ قاراشاسىندا الەكساندر توپۋريياعا, ال 2026 جىلدىڭ ماۋسىمىندا برازيلييالىق جان ماتسۋموتوعا ەسە جٸبەردٸ.
بەكزات الماحان ەندٸ مانسابىنىڭ جاڭا كەزەڭٸن گرۋزييانىڭ RKENA پروموۋشەنٸندە باستايدى.
RKENA – 2025 جىلدىڭ قازانىندا قۇرىلعان مما ۇيىمى. ليگا تۋرنيرلەرٸن نەگٸزٸنەن تبيليسيدەگٸ سپورت سارايىندا ٶتكٸزەدٸ.
پروموۋشەن وسى ۋاقىتقا دەيٸن ٷش ٸرٸ تۋرنير ۇيىمداستىرعان. Rkena FC 1 تۋرنيرٸ 2025 جىلعى 29 قاراشادا ٶتسە, Rkena FC 2 – 2026 جىلعى 14 ناۋرىزدا, ال Rkena FC 3 – 2026 جىلعى 16 مامىردا ۇيىمداستىرىلدى.
